Bakıda Çin avtomobillərinin festivalı keçiriləcək.

"Football-plus.az" xəbər verir ki, bu haqda Azərbaycan Avtomobil Dilerləri Assosiasiyası (AADA) rəsmi saytında məlumat yayıb. “China Auto Fest 2023” adlanan forum sentyabrın 22-24-ü aralığında “Park Bulvar” ticarət və əyləncə mərkəzində baş tutacaq. Festivalda Çinin 15 avtomobil brendinin ən son modelləri nümayiş olunacaq.  

Festival günlərində avtomobillərin sınaq yürüşlərinə yazılmaq və dilerlər tərəfindən təklif olunan xüsusi endirim kampaniyalarından yararlanmaq da mümkün olacaq. Tamaşaçılar üçün uduşlu müsabiqələr, ənənəvi Çin çay dəstgahı, uşaqlar üçün isə Çin mütəxəssislərinin yaratdığı dünya şöhrətli «Genshin İmpact» kompyuter oyunu da təşkil olunacaq. Əyləncə proqramına Çin folklor musiqisi, Çin mifologiyası mövzusunda “Kospley-defile” və “DJ-party” daxildi. Bir sözlə, AADA paytaxtın sakinləri və qonaqları üçün növbəti avtomobil bayramını təqdim edir.

AADA İdarə Heyətinin sədri Natiq Zərbəliyev bildirib ki, bu festival böyük bir layihənin başlanğıcıdı. Son vaxtlar ölkə avtomobil bazarında Çin markalarının çəkisi nəzərə alaraq, məhz bu ölkədən başlamaq qərara alınıb. İkinci səbəb isə bu ölkənin avtomobilləri ətrafında formalaşmış köhnə stereotipləri alt-üst etməkdi. Yaxın aylarda Böyük Britaniya, Almaniya, Amerika, Yaponiya, Koreya və İtaliya avtomobil istehsalçılarının məhsullarını nümayiş etdirmək üçün belə festivallar keçiriləcək.

Festivalların təşkilində əməkdaşlıq etmək üçün assosiasiya müvafiq ölkələrin səfirliklərinə müraciət ünvanlayıb. Qeyd edək ki, növbəti festivalın ulduzları Böyük Britaniya avtomobilləri olacaq.