Azı 10 il əvvəlin söhbətidi.

Gürcüstanlı çalışdırıcı Kaxaber Sxadadze bizim “İnter”i çalışdırırdı. Əcnəbi mütəxəssisin tərifini göylərə qaldırmışdılar. Deməli, Sxadadze neynirdi? Güclü rəqiblərlə oyunlarda komandası ultramüdafiə futbolu ilə bərabərliyə nail olur, zəif rəqiblər üzərində qələbə qazanırdı. “Kiçik qardaş” “Simurq” da “İnter”in rəqiblərini büdrədir, qardaşına irəli getməkdə yardım edirdi. Belə periodların birində “İnter” ardıcıl üç oyunda meydandan 0:0 hesablı heç-heçə ilə ayrıldı. Mənim sizə nəql etmək istədiyim əhvalat da həmin vaxt vaqeə oldu.

Mətbuat konfransında Sxadadzeyə “komandanız ardıcıl üç oyundu qol vura bilmir. Bunu necə qiymətləndirirsiz” sualını ünvanlamışdım ki, gürcü mütəxəssisin aqressivliyi ilə üzləşdim. Çalışdırıcı sualıma sualla cavab verdi, özü də yetərincə yüksək tonda: “Bəs bizə qol vururlarmı?” Sonra ara qarışdı, ağız deyəni qulaq eşitmədi. Bu hadisə uzun müddət mətbuatda müzakirə olundu. Həmkarlarımız arasında da bizi qınayanlar oldu ki, bəs gürcüstanlı mütəxəssisin xətrinə nahaq dəymişik, adam nəticəyə oynayan mükəmməl komanda qurub. Sxadadzeyə haqq verənlər iddia edirdilər ki, “İnter”in strateji hədəfləri ondan bunu tələb edir, uda bilmirsənsə, gərək uduzmayasan. İnsafən, Sxadadzenin “İnter”i bunu pis bacarmırdı, hər mövsüm mükafatlar uğrunda mübarizədə yer alırdı. Həmkarlarımız da Sxadadzenin və komandasının tərifini göyə qaldırırdı.

Bu əhvalatı xartırlamağım səbəbsiz deyil. “Zirə” hazırda premyer-liqada birinci pilləni tutur. Liderin 15 xalı var, ən yaxın izləyicisi “Qarabağ”ı 5 xal qabaqlayır. Qəsəbə təmsilçisi üçün yetərincə ciddi nəticədi. Özü də zirəlilər mövsümə elə “Qarabağ” üzərində qələbə ilə başlayıb. “Qarabağ”dan savayı “Zirə” çempionluğa daha bir iddialı komandanı, yəni “Sabah”ı 1:0 hesabıyla üstələməyi bacarıb. İki lider komandadan savayı Rəşad Sadıqovun komandası “Kəpəz”lə “Sumqayıt”ı eyni hesabla məğlub edib. Mövsümün sürprizlərindən sayılan “Səbail” “Zirə”nin qapısına yol tapmağı bacarsa da, öz qapısından iki qol buraxıb və nəticədə 1:2 hesabıyla uduzub. “Zirə” yeganə məğlubiyyəti “Qəbələ”dən alıb. Maraqlıdı ki, bu görüş də 0:1 hesabıyla yekunlaşıb.

Qeyd etmək istədiyim daha bir məqam ondan ibarətdi ki, “Zirə” “Sumqayıt”ı azlıqda qala-qala, məğlub edib. Son turda keçirilən qarşılaşmada “Zirə” 80 dəqiqədən çox azlıqda oynadı, referi Kamranbəy Rəhimovun müammalı qərarı meydan sahiblərini azlıqda qoydu. Buna baxmayaraq, “Zirə” vacib 3 xal qazanmağı bacardı. Mənzərə ondan xəbər verir ki, “Zirə” sırf nəticə qazanmağa hesablanan taktika ilə meydana çıxır. Rəşad Sadıqovun yetirmələri etibarlı müdafiə olunur, ələ düşən minimal qol fürsətlərindən maksimal yararlanır. Bu da “Zirə”yə nəticə qazandırır. Deməli, strateji baxımdan seçilən taktika özünü doğruldur.

“Zirə”nin bu nəticələrini, oyun üslubunu bəyənməyənlər var. Baxımlı futbol, məhsuldar oyunlar həvəsində olanların məyusluğu başadüşüləndir. Amma məlum məsələdi ki, “Qarabağ”, “Sabah” və “Neftçi” kimi zəngin büdcəyə, geniş heyətə malik komandaların mübarizə apardığı çempionatda “Zirə”nin başqa yolu yoxdu. Hələ “Neftçi”ylə “Sabah”ın bu qədər bahalı transferlərin fonunda nəticə qazana bilməməsinin, səxavətlə xal paylamasının fonunda Rəşad Sadıqovu qınamağa adamın dili də gəlmir. Unutmaq lazım deyil ki, illər öncə gürcüstanlı Sxadadze eyni üsulla nəticələr qazanır və təriflənirdi. Ona görə də Rəşad Sadıqovu qınamağa tələsməyək.

AMAL