“Sumqayıt”ın sabiq məşqçisi Elnur Çodarovun müraciəti əsasında Beynəlxalq İdman Arbitraj Məhkəməsinin (CAS) araşdırması yekunlaşıb.

"Football-plus.az" xəbər verir ki, qurum məşqçinin şikayətində haqlı olduğunu, “Sumqayıt”ın ona ödəməkdən imtina etdiyi 3 aylıq maaşı bir ay ərzində çatdırmasının vacibliyini qərarında göstərib. Bu barədə həm AFFA-ya, həm “Sumqayıt”a, həm də zərərçəkənin özünə məktub gəlib.

Xatırladaq ki, ötən ilin mayında AFFA Apellyasiya Arbitraj Tribunalının qərarları açıqlananda “Sumqayıt” klubu tərəfindən verilmiş apellyasiya şikayətinin təmin edildiyi bəlli oldu. Həmin qərarla AFFA-nın Oyunçuların Statusu və Transferi Komitəsinin “Klubda baş məşqçi köməkçisi vəzifəsini icra etmiş Elnur Çodarova klub tərəfindən kompensasiya ödənilməsi” barədə 17 mart 2022-ci il tarixli qərarı ləğv edildi. O zaman qurum sözügedən qərarı ictimaiyyətə açıqlamadığından bu barədə məlumatsız idik. Araşdırdıq və aydınlaşdı ki, sözügedən komitə Çodarovun müraciətini müsbət cavablayıbmış.

Ayxan Abbasov “Sumqayıt”ın baş məşqçi postundan istefaya göndəriləndə kompensasiya almağı bacarmışdı. “Kimyaçılar” çalışdırıcının müqaviləsində qeyd olunan öhdəlikləri yerinə yetirdi. Eyni müqavilə köməkçilərlə də bağlanmışdı. Yalnız Çodarov Abbasovla birlikdə klubu tərk etdiyindən, onun müqavilə şərtlərinin yerinə yetirilməsi gündəmdə idi. Amma klub rəhbərliyi, baş məşqçidən fərqli olaraq, Elnur bəyin müqaviləsindəki bəndləri yerinə yetirməmişdi. O da öz növbəsində, sivil qaydada Oyunçuların Statusu və Transferi Komitəsinə müraciət etmişdi. Qurum məşqçinin haqlı olduğunu araşdırıb və martın 17-də klubun müqavilənin qalan hissəsinin kompensasiyasının ödənilməsinin vacibliyi haqda qərar çıxarmışdı. Məsələni bitmiş saymayan Çodarov olayı İAM-a daşıdı. Əcnəbi hüquqşünaslarla əməkdaşlıq edən məşqçi haqqını tələb etdi.

Beləliklə, 2021-ci ilin dekabrında istefaya göndərilən, şikayətini ötən iln mayında edən Çodarovun haqqı 16 ay sonra təmin olundu. Beynəlxalq İdman Arbitraj Məhkəməsinin (CAS) qərarlarının detalları bəllidi. “Sumqayıt”ın sabiq məşqçisi Elnur Çodarovun müraciəti əsasında aparılan araşdırma yekunlaşdığından qurum son qərarını verib. İAM-ın tərəflərə göndərdiyi məktubu “Futbol+” də əldə edib.
37 səhifəlik məktubun sonundakı qərarıları diqqətinizə çatdırırıq:

İdman Arbitraj Məhkəməsi qərar verir:
1. Azərbaycan Futbol Federasiyaları Assosiasiyasının Apellyasiya Arbitraj Tribunalının 4 may 2022-ci il tarixdə çıxardığı qərardan Elnur Çodarovun 25 may 2022-ci il tarixində verdiyi apellyasiya şikayəti qismən təmin edilib.
2. AFFA-nın Apellyasiya Arbitraj Tribunalının 2022-ci il mayın 4-də çıxardığı qərar ləğv edilib.
3. “Sumqayıt” Futbol Klubu” MMC müqavilənin pozulmasına görə Elnur Çodarova 10725 (on min yeddi yüz iyirmi beş) Azərbaycan manatı məbləğində təzminat ödəməlidi.
4. İAM-ın Məhkəmə İdarəsi tərəfindən müəyyən edilərək tərəflərə təqdim olunacaq arbitraj xərclərinin 30 (otuz) faizi Elnur Çodarov, 70 (yetmiş) faizi isə “Sumqayıt” Futbol Klubu” MMC tərəfindən ödənilir.
5. Hər bir tərəf bu arbitrajla əlaqədar çəkdiyi və digər xərcləri öz üzərinə götürür.
6. Bütün digər, əlavə vəsatətlər və ya yardım tələbləri rədd edilir.
Arbitraj yeri: Lozanna, İsveçrə
Tarix: 4 sentyabr 2023-cü il

Tərəflərə göndərilən 37 səhifəlik məktubu bütövlüklə diqqətinizə çatdırmaq mümkün olmadı. Lakin reallıq budu ki, “Sumqayıt” – Elnur Çovdarov mübarizəsində məşqçi qalib gəldi. “Kimyaçılar”a ödənişlə bağlı vaxt verilib. Klub Beynəlxalq İdman Arbitraj Məhkəməsinin (CAS) qərarını bir ay ərzində icra etməlidi. Əks tədqirdə növbəti və daha ağır cəza qaçılmazdı. “Sumqayıt” qərarın tələblərini yerinə yetirməsə, əvvəlcə transfer qadağasına məruz qalacaq. Bundan başqa, maliyyə sanksiyaları da mümkündü.

İLKİN SULTANLI