Tural Bayramlının “Səbail”dən AFFA-ya şikayətçi olduğunu diqqətinizə çatdırmışdıq.

Hazırda “Araz-Naxçıvan”da çıxış edən yarımmüdafiəçi “dənizçilər”i müqavilədəki şərtləri yerinə yetirməməkdə ittiham edir. Məsələ ilə bağlı “Football-plus.az"a yeni informasiyalar daxil olub.

Sən demə, Bakı təmsilçisi Turalla müqaviləni qarşılıqlı razılıq olmadan pozub. Məhz bu səbəbdən də yarımmüdafiəçi AFFA-nın Oyunçuların Statusu və Transferi Komitəsinə müraciət edib. Məlumat üçün qeyd edək ki, 25 yaşlı futbolçu 2022/23 mövsümündə “Səbail”lə ikiillik müqavilə imzalamışdı. Qış fasiləsində klubda baş məşqçi dəyişikliyi oldu. Mahmud Qurbanovu Şahin Diniyev əvəzlədi. Bundan sonra Tural əvəzedici komandaya göndərildi. 2023/24 mövsümündə isə yarımmüdafiəçi “Araz-Naxçıvan”la rəsmi müqavilə imzaladı.

Prosesdən belə başa düşülür ki, “Səbail” futbolçuyla bağlı öhdəlikləri yerinə yetirməyərək yolları ayırıb. Tural da bu səbəbdən Oyunçuların Statusu və Transferi Komitəsinə müraciət edib. Futbolçu “Səbail”dən ona ödəməli olduğu pulu tələb edir. Burda az məbləğdən söhbət getmir. Əldə etdiyimiz məlumata görə, yarımmüdafiəçi klubda aylıq 7 min manat maaş alırmış. Müqavilələrin müddətinin 10 ay olduğunu nəzərə alsaq, Tural klubdan 70 min manat tələb edir. Bu məbləğ ödənilməyəcəyi təqdirdə futbolçu vəkili Elcan Həsənli ilə birgə Beynəlxalq İdman Arbitraj Məhkəməsinə müraciət edəcək. Çünki onların əlində “Səbail”in səhvə yol verməsi ilə bağlı sənəd var. Məsələnin ən maraqlı tərəfi də burdadı.
“Dənizçilər” Turalla müqaviləni ləğv edən zaman şərtləri yerinə yetirməyib. Burdakı bəndlərdən biri, ümumiyyətlə, PFL tərəfindən qəbul olunmamalıymış. Amma sənəd olduğu kimi təsdiqlənib. İndi bundan istifadə edən futbolçu klubdan 1 mövsümlük maaşını tələb edir. Əksi təqdirdə İAM-a müraciət etmək hüququndan yararlanacaq. Belə olan məqamda qurum futbolçunu haqlı hesab edəcək. Bunun nəticəsində klub həm futbolçuya 1 mövsümlük maaşını, bundan əlavə ümumi məbləğin 30 faizini və digər xərcləri ödəməli olacaq. Bu da təqribən 95 min manat edir. “Səbail”in cəzası bununla bitməyəcək. Ola bilər ki, FİFA kluba qarşıdakı mövsümlərdə transfer hüququndan məhrum etsin.

Gördüyünüz kimi, Tural Bayramlı – “Səbail” problemi böyüdükcə böyüyür. Hər şey AFFA-nın verəcəyi qərardan asılıdı. Federasiyanın Oyunçuların Statusu və Transferi Komitəsi Turalı haqlı hesab etməsə, “Səbail”i daha böyük cəzalar gözləyə bilər.

Bu məsələ ilə bağlı maraqlı tərəflərin mövqeyini işıqlandırmağa hazırıq.

İLKİN SULTANLI