Seçmə mərhələnin ilk oyunu ərəfəsində gənclər yığmasına ümid bəsləmək üçün müəyyən əsaslar var idi.

İlk növbədə ona görə ki, baş məşqçi Samir Əliyevlə yanaşı, futbolçular da oyundan əvvəl iddialı açıqlamalar verirdi. İkinci əsas kimi komandanın məhz bu oyuna hazırlıq üçün yetərincə vaxtının olduğunu göstərə bilərik. Amma müsbət nəticə ilə bağlı bütün ümidlər elə ilk 26 dəqiqədə “dəfn olundu”.

Meydan sahibləri 1-ci hissədə oyunun taleyini həll etdi. Onlar oyun başlayan kimi hücuma atıldı. Rəqib fiziki və taktiki cəhətdən Samir Əliyevin rəhbərlik etdiyi komandanı üstələyirdi. İlk qol 19-cu dəqiqədə vuruldu. Ergelaşın ötürməsini İliç dəqiq baş zərbəsi ilə tamamladı. Qoldan sonra komandamız özünə gələ bilmədi. Əksinə, daha da pis oyun sərgiləməyə başladı. 26-cı dəqiqədə İliç səkən topun sayəsində dublunu rəsmiləşdirərək hesabı 2:0 etdi. İlk yarının sonuna kimi komandamız heç nə ilə yadda qalmadı. Samir Əliyevin rəhbərlik etdiyi kollektiv qapı istiqamətinə bir zərbə də vura bilmədi.
İkinci hissə başlayan kimi komandamız hücuma atıldı. Lakin serbiyalılar yaxşı müdafiə olunurdu. Samir Əliyev əvəzetmələr hesabına oyunu dəyişmək istəsə də, işlər qaydasında getmədi. Futbolçularımız həm də kobud oyun sərgiləyirdilər. Bu da sonda türkiyəli hakimin komandamızı azlıqda qoyması ilə nəticələndi. Damadayev ikinci sarı vərəqəni alaraq meydanı tərk etdi.

Canlı yayınlanmayan oyunun reportajını, sadəcə, UEFA-nın xronikasına əsasən yazmışıq. Oyundan sonra baş məşqçilər görüş haqda fikirlərini səsləndirməyiblər. Duşan Corveviçdən xəbərimiz yoxdu, amma, görünür, Samir bəy məğlubiyyət haqda danışmağa söz tapmayıb.
Sentyabrın 11-12-də bu qrupda daha iki oyun keçirilib: Lüksemburq – İngiltərə 0:3, Ukrayna – Şimali İrlandiya 1:0. Yığmamız oktyabrın 12-də evdə Şimali İrlandiya ilə qarşılaşacaq.

İLKİN SULTANLI