"Bu amil qərar verməyimdə çox kömək oldu” - “Neftçi”nin yeni transferi
“Neftçi”də sözün həqiqi mənasında əla kollektivlə rastlaşdım”.
“Football-plus.az” xəbər verir ki, bunu “ağ-qaralar”ın yeni transferi Lukas Melano klubun televiziyasına müsahibəsində deyib.
Argentinalı futbolçu komandada müsbət ab-hava olduğunu söyləyib: “Çox yaxşı insanlardır. Komandada mükəmməl futbolçular toplanıb. Bunu dərhal hiss etmək olur. Burada olduğuma görə çox xoşbəxtəm. Gözəl nəticələr əldə etmək üçün kollektiv şəklində əzmkar çalışmalıyıq. Stadionda azarkeşlərlə bir-birimizi qısa zamanda tanımağımız üçün səbirsizlənirəm. Ümid edirəm ki, uğurlu mövsüm olar və birlikdə vacib nailiyyətlər qazanarıq”.
30 yaşlı hücumçu “Neftçi” ilə danışıqların çox qısa çəkdiyini bildirib:
“Hər şey çox tez baş verdi. Mənə zəng edib təklif olduğunu dedilər. Elə də çox vaxt yox idi. Çünki transfer bazarı artıq bağlanmaq üzrə idi. Ailəmlə, sevdiyim xanımla danışdım. Məxsus olduğum klub tərəfindən də danışıq aparmağa razılıq var idi. Bura gəlməyə çox istəkli idim. Danışığın müsbət yekunlaşması məni çox sevindirdi”.
O, təklif aldığı zaman Bakı klubunun sabiq oyunçusu Xorxe Korrea ilə məsləhətləşdiyini etiraf edib:
“Azərbaycan, ölkə çempionatı və klub haqda məlumatım var. Dostum Xorxe Korrea burda oynayıb. Uşaq yaşlarında Argentinada birlikdə çıxış etmişik. İlk olaraq onunla əlaqə saxladım. Klub, insanlar, şəhər və çempionat haqqında çox yaxşı sözlər dedi. Bu amil qərar verməyimdə çox kömək oldu”.
Melano hücum və yarımmüdafiə xəttində oynamaq bacarığına malik olduğunu vurğulayıb:
“Ən sevdiyim mövqe hücumun sağ cinahıdı. Sol cinahda və sırf hücumçu kimi də oynamağı bacarıram. 4-4-2 sxemində yarımmüdafiənin sağ cinahında çıxış edə bilirəm. Məşqlərə davam etməliyəm. Hansı mövqedə oynamağıma baş məşqçi qərar verəcək. Əlimdən gələnin ən yaxşısını etməyə çalışacam”.
Forvard hazırda yaxşı formada olduğunu bildirib:
“Ötən həftə sabiq klubumla oyuna çıxmışam. İstirahət etmək üçün yalnız üç günüm oldu. İlk günü ailəmlə sağollaşmağa həsr etdim. Növbəti gündə hazırlaşdım. Üçüncü günümdə isə təyyarəyə minib buraya gəldim”.
Qeyd edək ki, Lukas Melano “Neftçi” ilə 2 illik müqavilə bağlayıb.
Digər xəbərlər
