Türkiyə yığmasının düşərgəsində vəziyyət yenə gərgindi.

“Football-plus.az” xəbər verir ki, Ermənistanla evdəki bərabərliyin ardından “ay-ulduzlular”ın baş məşqçisi Ştefan Kuntsun gələcəyi haqda yenə müxtəif şayiələr yayılıb. Almaniyalı mütəxəssisin Ermənistanla oyundan sonra “adamların bizi nə üçün tənqid etdiyini anlamıram” ifadəsi onsuz da Türkiyə futbol ictimaiyyətində ona qarşı birmənalı olmayan fikirləri bir qədər də gücləndirib. Qardaş ölkənin növbəti rəqibi Yaponiyadı. Bu oyun bu gün Belçikada yoldaşlıq matçı çərçivəsində keçiriləcək. Maraqlıdı ki, Kunts dünən baş tutan oyunöncəsi mətbuat konfransında yenə Ermənistanla oyundan sonra söylədiyi sözlərə bənzər ifadələr işlədib: “Təbii ki, oyunçularımın üzgünlüyünü anlayıram. Ermənistanı məğlub etsəydik, AÇ-yə doğru mühüm bir addım atmış olacaqdıq. Amma yenə də hazırda Türkiyə futbol ictimaiyyətində hökm sürən ruh düşkünlüyünün səbəbini anlamıram. Qrupdakı durumumuz hələ də çox yaxşıdı. Taleyimiz öz əlimizdədi və final məhrələsinə vəsiqə qazanacağıq”.

Ermənistanla oyundan sonra Türkiyə mətbuatında Kuntsun Abdulla Avcı ilə əvəzlənəcəyi barədə iddialar dolaşmağa başladı. Avcının şənbə günü Türkiyə Futbol Federasiyasının binasına yollanması şayiələri bir qədər də gücləndirdi. Sərgən Yalçın və Fatih Terimin də adı namizədlər arasındadı. Amma çox keçmədən Avcının federasiyaya yollanmasının əsl səbəbi bəlli oldu. Bunu və digər məqamları federasiya prezidenti Mehmet Büyükekşinin öz dilindən dinləyək: “Ermənistan üzərində qələbə bizə qrupda böyük üstünlük qazandıra bilərdi. Amma nəticə istədiyimiz kimi olmadı. Buna rəğmən, yolumuza davam edirik. Qalan üç matçımızı eyni ciddiliklə oynayacağıq. Oktyabrda Xorvatiya və Latviya ilə oyunlarda istədiyimiz nəticələri qazanıb AÇ-yə vəsiqəni təmin edəcəyimizə inanıram. Abdulla Avcının yığmanın başına keçəcəyi ilə bağlı şayiələr doğru deyil. Avcı federasiyaya, sadəcə, hakimlər üçün keçirdiyimiz seminarda qonaq qismində iştirak etmək üçün gəlmişdi. Bunu bir neçə gün öncədən planlaşdırmışdıq. Onun gəlişinin yığma ilə yaxından-uzaqdan heç bir əlaqəsi yoxdu. Kuntsla bağlı nəsə demək düzgün deyil. Xal itirmişiksə, bunda hamımızın payı var. Kunts Xorvatiya ilə oyunda komandanın başında olacaqmı? Bəli. Komandada ab-hava yaxşıdı. Dostluq ən üst səviyyədədi və heç bir problem yoxdu. Qarşıda bizi Yaponiya ilə oyun gözləyir. Yaponlar yüksəlişdədi. Son mündialda 1/8 finalda xorvatlara penalti seriyasında uduzdular. Onlar FİFA-nın reytinqində 20-ci, biz isə 41-ci pillədəyik. Son oyunda səfərdə Almaniyanı 4:1 məğlub etdilər. Bu, dostluq matçıdı. Belə oyunlarda özümüzdən güclü rəqiblərlə qarşılaşmaq yaxşı haldı. Xorvatiya ilə oyun üçün yaxşı bir hazırlıq olacaq. Noyabrdakı yığma pəncərəsi zamanı da bir boşluğumuz olacaq. Həmin vaxt isə Almaniya ilə qarşılaşmaq istərdik. Almanlarla bununla bağlı danışıqlar aparırıq. Oyunçularımızın AÇ-dən öncə güclü rəqiblərlə matçlarda necə təsir bağışlayacağını görmək istəyirik”.

Göründüyü kimi, federasiya seçmə mərhələnin belə həlledici məqamında məşqçi dəyişikliyinə getməyə risk etmir. Amma böyük ehtimalla oktyabrda Xorvatiya və Latviya ilə oyunlar Kuntsun son şansı olacaq.