Məlum olduğu kimi Türkiyə yığması AÇ-2024-ün seçmə mərhələsi çərçivəsində səfərdə məğlub etdiyi Ermənistanla öz meydanında bacara bilmədi.

Hətta qardaş ölkənin komandası Əskişəhərdə keçirilən oyunda məğlubiyyətdən son anda qurtuldu. Bu matçın ardından baş məşqçi Ştefan Kuntsa yönələn tənqidlər artmağa başlayıb. Türkiyə futbol ictimaiyyəti onsuz da bu oyuna qədər də Kunstdan razı deyildi. Türkiyə mətbuatında almaniyalı mütəxəssislə bağlı şaiyələr yayılıb. Həmin şaiyələrə əsasən Kunts sentyabrın 12-də Yaponiyaya qarşı keçiriləcək yoldaşlıq oyununun ardından istefaya göndəriləcək. Çünki federasiyada faktiki olaraq yığmaya cavabdeh yönətici Həmit Altıntopdan başqa heç kim artıq almaniyalını dəstəkləmir. Onu əvəzləməyə ən real namizəd Abdulla Avcıdı. Sərgən Yalçın, Fatih Terim, Rza Çalımbay və Aykut Kocaman da namizədlər arasındadı. Ən son 2021/22-də ''Trabzonspor''u çempion edən, ötən mövsümün gedişində uğursuz nəticələrdən sonra istefa verən və hazırda boşda olan Avcının dünən Türkiyə Futbol Federasiyasının binasına yollanması şaiyələri bir qədər də artırıb. Amma məlum olub ki, Avcı heç də danışıqlar üçün TFF-nin binasına yollanmayıb. Sadəcə federasiya yığma fasiləsindən istifadə edərək hakimlər üçün seminarlar keçirir. Avcı da həmin seminarda çıxış etmək üçün federasiyaya yollanıbmış. Bununla belə bəzi mənbələr iddia edir ki, bu mütəxəssis hələ də yığmanın başına keçməyə əsas namizəddi. Onun köməkçisinin isə Əmrə Belözoğlu olacağı iddia edilir. Türkiyə ən azı AÇ-2024-ün seçmə mərhələsini bu məşqçilərlə başa vurmağı planlaşdırır. Hər halda Yaponiya ilə oyundan sonra bir çox suallara aydınlıq gələcəyi gözlənilir. Türkiyənin seçmə mərhələdə öz qrupunda 5 oyuna 10 xalla 1-ci pillədə qərarlaşdığını bildirək. Xorvatiya ilə Ermənistan 7 xalla 2-3-cü pillələri bölüşdürür. Amma Türkiyədən fərqli olaraq Xorvatiya 3, Ermənistan isə 4 oyun keçirib.

Əli