"Əslində matçla bağlı dəqiq danışmaq üçün mütəxəssis olmağa ehtiyac yoxdu. Baxımlı oyun göstərdik. Ən azı millimizi qapı önünə sıxışdırıb topla "döymədilər". Qarşılaşmadan öncə də demişdim ki, Belçikaya qarşı daha diqqətli çıxış etməli və kiçik şanslardan belə maksimum yararlanmalıyıq. Məncə, müdafiə xəttimiz özünü yaxşı tərəfdən göstərdi. Hücumda isə xeyli imkan əldə etdik. Qol və ya qollar vura bilərdik. Təəssüf ki, Emin göydəndüşmə şansdan istifadə edə bilmədi. Hər halda, qol hesabını erkən açsaydıq, sonda heç-heçə edə bilərdik. Elvin Cəfərquliyevin də hücumu çox maraqlı alındı. Ümumiyyətlə, belə komandalara qarşı yarımqol epizodlarından belə yararlanmağa məcbursan. Çünki güclü rəqiblərlə sınaqda bu tip şansların sayı çox olmur. Ümumiyyətlə, komanda gözləniləndən daha yaxşı oynadı. Növbəti sınaqlarda millimizə uğurlar arzulayıram".