Futbolçu Vadim Abdullayev peşəkar karyerasına “Bakı”da başlayıb.

Yolu “Simurq”, “Qəbələ”, “Sumqayıt”, “Şüvəlan”, “Sabah” kimi klublardan keçən yarımmüdafiəçi hazırda “Araz-Naxçıvan”da çıxış edir. Maraqlıdı ki, 2020-ci ildə Masazır təmsilçisiylə yollarını ayıran Vadim sanki qeybə çəkildi. 2022-ci ildə isə onu 1-ci divizon iştirakçısı “qırmızı-ağlar”ın heyətində gördük. Naxçıvanlıların baş məşqçisi Azər Bağırov premyer-liqanın ilk 5 turunda futbolçuya şans veribsə, o da yaxşı performansıyla diqqət çəkib. “Araz-Naxçıvan”ın “Kəpəz”lə görüşündən sonra qeyd olunanlarla bağlı Vadimlə danışdıq.

- “Sabah”dan ayrılandan sonra 2 il futboldan uzaq qaldın. Nə baş vermişdi?
- Düzdü. Meydanlardan uzaq düşdüm. Gün gələcək hər şeyi danışacam. Bəzi məsələləri danışmağın vaxtı deyil. Əsas odu ki, geri döndüm. Sağ olsunlar, mənə güvənib yenidən futbola qaytardılar. “Sabah”dan ayrılandan sonra 3-4 ay MOİK-də oynadım. Ümumiyyətlə, o dönəmdə başverənlər məni küsdürdü. İnciyib ailəmlə birlikdə ölkəni tərk etmişdim. Rusiyadaydım.

- Səni bunlara vadar edən səbəblər maraqlıdı...
- Saymaqla bitməz. Futbolda başverənlər, ətrafımda qurulan oyunlar, danışılanlar... Dediyim kimi, zamanı gələndə heç nəyi gizlətməyəcəm.

- Çəkindiyin nəsə var? Bəlkə karyerana zərər verməkdən qorxursan?
- Xeyr. Emosional və hər şeyi açıq danışan biri olmağım heç kimə sirr deyil. Onsuz da bəziləri məni qalmaqallı futbolçu kimi tanıtmışdı. Sadəcə, indi uyğun vaxt deyil. Onu deyim ki, futboldan birdəfəlik qopmuşdum.

- Necə oldu ki, “Araz-Naxçıvan”a gəldin? Səni kim dəvət etmişdi?
- Baş məşqçimiz Azər Bağırov və komanda yoldaşım Orxan Əliyevin çağırışıyla qayıtmışam. Klub olaraq, ciddi və məsuliyyətli yoldan keçdik. Bu yerlərə əziyyətlə gəlib çıxmışıq. Şükür Allaha, etdiklərimizin bəhrəsini görürük.

- Dəvəti dərhal qəbul etdin, yoxsa ilk başda özünü hazır hiss etmirdin?
- Sözün düzü, tərəddüdlərim var idi. Amma bu, fiziki hazırlıqla bağlı deyil. Həmişə meydana çıxıb başdan sona qədər mübarizə aparacaq gücdə olmuşam. Psixoloji cəhətdən narahat idim. Bəzi halların yenidən yaşanması ehtimalını nəzərə alırdım. Sonda ailəm yanımda oldu və onlar da istədi ki, futbola qayıdım.

- Qarşına hansı məqsədləri qoymusan? Meydanda necə Vadim görəcəyik?
- Artıq lazımi dərsi almışam. Motivasiyalıyam. Ən əsası ailəm yanındadı. Bəzilərinə sübut etməli olduğum şeylər var. Zamanla hər kəs bunun şahidi olacaq. Təbii ki, öncəliyim ailəmi sevindirməkdi. Hər gün öz üzərimdə çalışıram. Potensialımı artırıram.

- Yaşadıqlarını “Sabah”la əlaqələndirə bilərəm?
- Orda da hörmətsizlik görmüşəm. Amma məhz ora ilə bağlı deyil. Aydınlaşdırılmalı çox məsələ var.

- Başverənlərin günahkarları sırasında özünü də görürsən?
- Əlbəttə. Mənim də səhvlərim olub. Amma hər kəs səhv edə bilər. Mənə qarşı yanaşmalar isə daim fərqli olub.

- Vaxtilə səni futboldan küsdürən adamlar indi də bu sahədədi?
- Bəli. Onlar hər şeyi görür. İstəyimi, mübarizəmi izləyirlər. Onlara qarşı prinsiplərim var. Bu, ömür boyunca belə olacaq. Fərqi yoxdu, klubun rəhbəri kimdi, nə işlə məşğuldu...

- “Vadim Abdullayev od püskürdü”. Müsahibənin sörlövhəsini belə qoya bilərəm?
- “Qayıtdı” yazsan, daha yaxşı olar. Özü də Rusiyada fəhləlik edib qayıtmışam (gülür).

KƏNAN BAHADIR