Qadın voleybolçulardan ibarət yığmamız üçün bazar günü başa çatan Avropa çempionatı uğursuz oldu.

Komanda qrupda qaldı. Bəzi mütəxəssisləri yığmanın baş məşqçisi Ataman Güneyligilin heyət seçimini də bəyənmədilər. Turnirə aparılmayan Şəfaqət Alışanova ilə söhbətdə bəzi suallara cavab tapmağa çalışdıq.

- Avropa çempionatına milli ilə birlikdə yollanmadın. Güneyligil səni turnirə aparmadığı üçün tənqid olundu. Bu qərarın səbəbini səndən soruşaq..
- Nə yalan deyim, Avropa çempionatına aparılmamağım özüm üçün də sürpriz oldu. Bu haqda çox şey danışmaq istəmirəm. Məşqçinin seçimi belə oldu. Səbəbini demədi. Sadəcə, mənə “turnirdən qayıdandan sonra danışarıq” dedi. İndi də yarışdan sonra ölkəni tərk edib.

- Buna görə kimdənsə incimisən?
- Xeyr, heç kimdən inciməmişəm. Belə şey ola da bilməz. Kimdən küsəcəm ki?! (gülür)

- Yığmanın uğursuzluğunun səbəbi nə idi?
- Düşünürəm ki, AÇ-yə hazırlaşmaq üçün iki ay az idi. Məşq prosesimiz yaxşı idi. Lakin hamının bir-birinə uyğunlaşması üçün vaxtımız az oldu. Nəzərə alsaq ki, qızlarımız fərqli ölkələrdə çıxış edirlər və onların dönəndən sonra uyğunlaşma dövrü uzun çəkir. Milli üzvləri əlindən gələni edirdi, hətta zədə ilə oynayanlar da var idi.

- Məşqçinin işini bəyəndizmi? İlk oyundan son oyuna kimi eyni səhvlər oldu. Bəyaz Quliyevanı yox, daha yaşlı Yuliya Kərimovanı meydana buraxan məşqçinin seçiminin yanlış olduğunu gördük...
- Turnirdən əvvəl çox yaxşı məşqlər keçirdik. Hər məşqdə yeni bir şey edirdik. Həmişə qızlarla da danışırdıq ki, məşq prosesi ayrı, görəsən, oyunlarda da bunu göstərə biləcəyikmi? Bəyazla Yuliyanın məsələsinə gəlincə, məncə, bunu Ataman bəydən başqa hamı görürdü.

- Bu nəticəni yerli məşqçi ilə də qazanmaq olardı.
- Bu nəticəni yox, bundan da daha yaxşısını Ziya Rəcəbov bacarardı. Düşünürəm ki, Ziya bəyin rəhbərliyi altında yığma uğur qazanardı.

- Federasiya Ataman Güneyligillə yola davam etməlidimi?
- Fikrimcə, Ataman Güneyligillə yola davam edilməməlidi. Milliyə yeni nəfəs lazımdı. Fərq etmir - yerli və ya əcnəbi. Lakin buna qərar verən biz deyilik.

- Azərbaycan voleybolunun hazırkı durumu səni qane edirmi?
- Son 3-4 ildə voleybolumuz əvvəlki günlərindən çox uzaqdı. Hazırda inkişaf üçün yeni rəhbərlik hər şey edir. Bakıda və bölgələrdə seleksiya işləri aparılır. Bu da Azərbaycan voleybolunun gələcəyinin olacağından xəbər verir. İnşallah, 3-4 ilə bunun nəticələrini görərik. Voleybol üçün yeni addımlar atan rəhbərliyimizə təşəkkür etmək istəyirəm. Voleybola yeni başlayan qızlara da uğurlar arzulayıram.

- Ölkə çempionatı barədə nə deyə bilərsən?
- Builki çempionatımız ötən mövsümdən çox maraqlı olacaq. Bunu həm kişi, həm də qadın voleyboluna aid eləmək olar.

- Səncə, bir neçə ilə yeni Ayşənlər, Şəfaqətlər, Bəyazlar, Ülkərlər yetişəcəkmi?
- Bir neçə dəfə gənc qızların məşqlərini izləmişəm. Perspektivli qızlarımız çoxdu. İndi onlar ruhdan düşməməli və öz üzərlərində daim çalışmalıdılar.

- Geriyə dönüb baxsaq, karyeranda "kaş bunu etməzdim" demisənmi?
- İlk dəfə ölkə xaricində oynamağa 2018-ci ildə getmişəm. Kaş daha tez gedəydim. Peşmanlıq bu olub.

- Bəs Avropaya daha tez getməyinə nə mane oldu?
- Heç bir şey. Sadəcə, bu haqda düşünmürdüm.

- Bu yay sənə xaricdən təkliflər oldu?
- Agentimə demişdim ki, heç bir təklifi qəbul etmə. Çünki xaricdə oynamaq istəmirəm. Bu il Azərbaycanda oynamaq istəyirəm.

- Daha neçə il voleybolla məşğul olmaq niyyətindəsən?
- Hələ ki bu haqda düşünməmişəm. Voleybol sevdiyim işdi və keryerama davam edirəm.

- Voleybolla məşğul olmaq istəyən, lakin qarşısına müəyyən çətinliklər çıxan qızlarımıza nə məsləhər görərdin?
- "Kimsə mənim haqqımda nə fikirləşir" düşüncəsi ilə yaşamasınlar, karyeralarını qursunlar. Daha sonra ailə həyatı. Təbii ki, hər kəsin bu məsələyə fərqli yanaşma tərzi var. Mənim bu sözlərimə qarşı çıxanlar da ola bilər.

- Bəs sən özün belə çətinliklə rastlaşmısan?
- Xeyr. Həyat yoldaşım (Elmin Alışanov – red.) da voleybolçudu, həmişə mənə dəstək olur.

CAVİD ƏLİYEV