Kişi voleybolçulardan ibarət yığmanın üzvü, ötən mövsüm "Murov"la ölkə çempionluğu yaşayan Elmin Alışanovla titul qazandığı komanda, qadınlardan ibarət millinin AÇ-dəki çıxışı və ölkə voleybolu barədə söhbətləşdik.

- Yeni mövsümdə də səni "Murov"da görəcəyik?
- İnşallah. Artıq komandayla yeni müqavilə bağlamışam. Mənlə birlikdə ötən mövsüm çıxış edən oyunçular da burda qaldı. Heyətin 70-80 faizi bizlədi.

- Son ölkə çempionusuz, avrokuboklarda iştirak edəcəksiz. Legioner transferi gözlənilir?
- 5 legionerlə müqavilə bağlamışıq. Onların ikisi ötən mövsümdən bizlə olanlar idi. Yaxınlarda iki iranlı, bir türkiyəli voleybolçu ilə anlaşmışıq.

- Yeni mövsümdəki hədəfləriniz nədi?
- Hədəfimiz həmişə olduğu kimi yüksək yerlər uğrunda mübarizə aparmaqdı. Ötən mövsüm ölkə çempionu və Heydər Əliyev kubokunun qalibi olduq. Çox yaxşı mövsüm keçirdik.

- Qadınlardan ibarət yığmanın Avropa çempionatındakı çıxışını necə dəyərləndirirsən?
- Millimizin bu turnirdə zəif çıxış etməsinin səbəbi çoxdu. Pandemiyadan sonra həm kişi, həm də qadın voleybolu zəiflədi. Toparlanmaq da gec oldu. Federasiya da ölkə voleybolunun sürətli dirçəlişi üçün nəsə etmədi. Yeni rəhbərlik bunun üçün uşaq voleybolunun, ölkə çempionatının inkişafı üçün yeni addımlar atır. Digər məqam isə baş məşqçi seçimini yanlış olması idi. Yığmanı daha təcrübəli əcnəbi çalışdırıcıya həvalə eləmək olardı. Bu nəticəni istənilən yerli məşqçi, hətta federasiyada işləyənlər də qazana bilərdi.

- Ataman Güneyligilin heyət seçimini tənqid edənlər var. Sənin buna münasibətin necədi? Yerli oyunçulardan Şəfaqət, Ülkər də turnirdən kənarda qaldı.
- Əslində baş məşqçi Şəfaqətlə Ülkəri AÇ-yə aparmalıydı. Hazırda bir çox millilər və klublar yarışlara üç ötürücü aparır. 5 orta oyunçu aparan kollektiv yoxdu. Maksimum 4 orta voleybolçu apara bilərsən. Yığmanın görüşlərini izlədim. Libero mövqeyinin düzgün seçilməməsi və digər oyunçuların gec əvəzlənməsi səhv addım idi. Mən bu turnirdə Bəyazı, Ayşəni, Rubanı, Odinanı çox bəyəndim. Onlar meydanda bütün güclərini qoyurdular.

CAVİD ƏLİYEV