AÇ-2024-ün seçmə mərhələsində Belçika, beynəlxalq yoldaşlıq oyununda isə İordaniya yığması ilə qarşılaşacaq millimizin heyəti müəyyənləşib.

Baş məşqçi Canni de Byazi yığmaya 26 futbolçu dəvət edib. İtaliyalı mütəxəssis Ramil Şeydayevin çıxış etdiyi “Buriram Yunayted” klubunun Asiya Çempionlar Liqasında iştirakını nəzərə alaraq, hücumçunun Belçika ilə oyundan sonra millini tərk etmək istəyini müsbət qarşılayıb. De Byazinin yığmaya dəvət etdiyi futbolçuların siyahısı: qapıçılar - Şahrudin Məhəmmədəliyev (Qarabağ), Səlahət Ağayev (Səbail), Yusif İmanov (Sabah); müdafiəçilər - Amin Seydiyev (Sabah), Anton Krivotsyuk (Daejon Hana, Cənubi Koreya), Bəhlul Mustafazadə, Toral Bayramov, Rahil Məmmədov, Elvin Cəfərquliyev (hamısı "Qarabağ"), Bəxtiyar Həsənalızadə (Tuzlaspor, Türkiyə), Höccət Haqverdi (Neftçi), Elvin Bədəlov (Sumqayıt), Yusif Nəbiyev (Səbail); yarımmüdafiəçilər - Coşqun Diniyev (Ümraniyəspor, Türkiyə), Elvin Camalov (Sabah), Emil Səfərov (Qəbələ), Emin Mahmudov, Filip Ozobiç (hər ikisi "Neftçi”), Rüstəm Əhmədzadə, Qismət Alıyev (hər ikisi "Zirə"), Ozan Can Kökçü (Eyndhoven, Niderland), Aleksey İsayev (Sabah); hücumçular - Mahir Emreli (Dinamo, Xorvatiya), Ramil Şeydayev (Buriram Yunauyed, Tayland), Renat Dadaşov (Qrasshopper, İsveçrə), Musa Qurbanlı (Yurqorden, İsveç).

De Byazinin seçimləri yenə ictimaiyyət arasında söz-söhbət doğurdu. Əsas məqam öz klublarında nadir hallarda meydana çıxan futbolçularla bağlıdı. Məsələn, Höccət Haqverdinin yığmaya dəvət olunması böyük sual doğurdu. Çünki müdafiəçi “Neftçi”nin heyətində bu mövsüm cəmi 12 dəqiqə meydanda olub. 2023/24 “futbol ili”ndə Türkiyənin “Tuzlaspor” klubuna keçən Bəxtiyar Həsənalızadənin də milliyə dəvət alması birmənalı qarşılanmadı. Çünki oyunçu İstanbul təmsilçisində cəmi 1 oyunda 8 dəqiqə meydanda olub.

Yığmanın heyətində debüt şansı əldə edən futbolçu da var. Söhbət Yusif Nəbiyevdən gedir. 2022/23 mövsümündə “Kəpəz” yaxşı performans sərgiləyən müdafiəçi cari “futbol ili”ndə “Səbail”in uğurları üçün tər tökür. Çempionatda 4 oyuna çıxan Yusif 1 qol vurmağı da bacarıb. Son iki mövsümdəki performansını nəzərə alanda Nəbiyevin yığmaya dəvət olunması doğru qərardı.

Çağrılanlardan daha çox yığmaya De Byazinin siyahısından kənarda qalanlar səs-küyə səbəb olub. Əsas problem Rövlan Muradovla bağlıdı. “Qəbələ”dən “Sumqayıt”a keçən yarımmüdafiəçi yeni komandasında 4 qarşılaşmada 2 qol vurub, 3 məhsuldar ötürmə verib. Bu mövsüm məxsus olduğu komandaya ən çox fayda verən yerli futbolçular siyahısında liderlik edən 25 yaşlı oyunçunun yığmamaya çağrılmaması sual doğurar məqamdı. Sağ cinahda həm yarımmüdafiədə, həm də müdafiədə oynayan Rövlan ən azı məşq prosesində iştirak edə bilərdi. Siyahıya nəzər yetirəndə millinin heyətində konkret iki sağ cinah müdafiəçisi var. Bunlar Qismət Alıyevlə Amin Seydiyevdi. Çox güman, De Byazi “Sabah”ın üzvünü əsas heyətdə düşünür. Onu “Zirə”nin üzvü Qismət Alıyev əvəzləyə bilər. Toral Bayramovun da burda oynamaq ehtimalı var. Çünki son vaxtlar Qurban Qurbanov Toralı sağ cinahda müdafiəçi kimi sınayır. Ən pis halda italiyalının sevimli futbolçusu Höccət Haqverdi də burda oynaya bilər. “Neftçi”də əsas heyətdə oynamaq şansı əldə edə bilməyən İran əsilli oyunçunun əvəzinə Rövlanın yığmaya dəvət olunması daha doğru qərar olardı.

Bir müddətdi yığmaya dəvət olunmayan Qara Qarayev “Neftçi”yə keçəndən sonra millinin qapılarının onun üzünə açılacağı gözlənilirdi. Flaqmanın heyətində 5 oyunun hamısında 90 dəqiqə meydanda olan yarımmüdaifəçi əsas komandamıza da fayda verə bilərdi. Görünür, italiyalı qoca azərbaycanlı futbolçu ilə ədavəti davam etdirməyi düşünür.

İLKİN SULTANLI