“Sözün düzü, mən hələ şokdan ayılmamışam. Başverənlərin təsiri altındayam. Nə deyəcəyimi bilmirəm. Tanıdıqlarımın əksəriyyətinin zəngini aça bilmirəm. Psixoloji cəhətdən çökmüşəm. Bütün oyunlara çox ciddi hazırlaşmışdıq. İlk iki qarşılaşmada əziyyətimizin bəhrəsini gördük. Sonuncu sınağın nəticəsi sürpriz oldu. Özümə gələ bilmirəm. Meydanda gözəgörünməz o qədər kobud səhvlər etdik ki, futzalı peşəkar səviyyədə bilənlər buna, sadəcə, gülə bilər... Cəmi 4 dəqiqə meydanda oldum. Baş məşqçimizin qərarının səbəbini anlaya bilmirəm. Özü ilə danışmaq niyyətindəyəm. Psixologiyam düzəldikdən sonra onunla görüşüb ətraflı söhbət edəcəm. Mənə deyəcəyi istənilən səbəbə qarşı verəcəyim suallar var. Orda nə baş verdiyini bilmirəm. Məlumatsızam və səbrsizliklə bu məsələnin necə bitəcəyini gözləyirəm. Təkəbbürlülük olmasın, “Riqa” çox zəif idi. Mənim başdan sona qədər mübarizə apardığım meydanda onlara uduzsaq, futzalı tərk edərəm. Deyərəm ki, bilmirəm bu işi... Anlayışım yoxdu... Günahı kiminsə üstünə atmaq fikrində deyiləm. Hər birimiz tək-tək məğlub sayılırıq. Legionerləri də qınamaq düzgün deyil. Bəlkə nə vaxtsa xarici ölkədə çıxış edəndə mənim də səhvlərim olar. Amma başverənləri qavraya bilmirəm. Nə oldu? Nə baş verdi? Mənə çox şey qaranlıq qalıb. Tək çarəmiz DÇ-2024-də daha yaxşı çıxış edib təsəlli tapmaqdı. 13 gün ərzində toparlanmalıyıq. Adətən, belə zamanlarda “növbəti sınaqlara daha ciddi hazırlaşacağıq” deyirlər. Amma mən inanmıram ki, Çempionlar Liqasına hazırlaşdığımızdan daha yaxşı nəsə edək...”