“Meydana çıxdığım hər iki matçda əlimdən gələni etdim. Qapıçı kimi bir qol belə buraxmadım (rəqiblər yalnız Emin əvəzləndikdən sonra qapıya yol tapmağı bacarıb – red.), kapitan kimi komandam üçün bütün gücümü ortaya qoydum. Özümü ən yaxşı formada hiss edirəm. Bu haqda hər kəs mənimlə razılaşır. İndiyə qədər bəzi haqsızlıqlarla üzləşmişəm. Sonuncu matda başverənlər isə həqiqətən sürpriz oldu. Düşünün ki, həm əsas millinin, həm də komandanın kapitanı ən yaxşı formasında olduğu halda, həlledici görüşdə meydana çıxmır. Əslində son ana qədər ilk “ beşlik”də olacağımı düşünürdüm. Nə baş verdisə, start heyətində yer almadım. Baş məşqçi Vitali Borisovla səmimi münasibətlərimiz var. Uzun müddətdi tanışıq. Bəzi məsələləri çox qabartmaq istəmirəm. Bir dost kimi arzulayırdım ki, yaxşı nəticələr əldə etsin. Amma bu qərarının səbəbini anlaya bilmədim. Mənim meydana çıxmamağım komandada ruh düşkünlüyü yaratdı. Çalışırdım ki, buna imkan verməyim. Onlara dəstək olurdum. Sizi əmin edim ki, “Riqa”yla 10 dəfə qarşılaşsaq, azı səkkizində qalib gələrik. Həmin matçda da zəfər bizim olacaqdı. Həm fiziki, həm də psixoloji cəhətdən daha üstün idik. İlk iki oyunda da qapını yaxşı qorumuşdum. Anlamadığım şəkildə əvəzlənirdim və rəqib qol vururdu. Başverənlərə izah verə bilmirəm. Hər şey çox müəmmalıdı. Sonuncu matç sırf təcrübənin danışdığı oyun oldu. Məhz qapıçımızı (Luka Pavloviç – red.) günahlandırmaq istəmirəm. Amma işin öhdəsindən gələ bilmədiyi aşkar ortada idi. Nə bilim, hər dəfə bir səhvdən uduzuruq, bu dəfə də belə oldu. Məsələlər həm klub, həm də federasiya tərəfindən araşdırılır. Yəqin ki, yaxın günlərdə yeniliklər bəlli olacaq”.