“Qarabağ”ın adı artıq ölkə xaricində də tanınmaqdadı.

Müxtəlif ölkələrin mediasında “köhlən atlar”la bağlı xəbərlər yayılır. Braziliya mətbuatının məlumatına görə, “Adriano Sports” agentliyinin iki üzvü Ağdam təmsilçisinin diqqət mərkəzindədi. Bunlar “Valyadolid”də çıxış edən Robert Kenedi Nunes do Nasçimento və “Panatinaikos”un üzvü Bernard Kaldeyra Duartedi. 27 yaşlı Kenedi sol cinah vingeridi. Futbolçu müdafiədə oynaya bilir. O, karyerası ərzində “Fluminense”, “Çelsi” “Uatford”, “Nyukasl”, “Qetafe”, “Qranada”, “Flamenqo” kimi klublarda çıxış edib.

Bernard da sol cinah vingeridi. 30 yaşlı futbolçu yarımmüdafiənin mərkəzində və sağında oynaya bilir. Braziliyalı indiyə kimi “Atletiko Mineyro”, “Demokrata”, “Şaxtyor”, “Everton”, “Şarjah” kimi klublarda çıxış edib.

Redaksiyamıza bu futbolçuların “Qarabağ”a transferi ilə bağlı yeni məlumat daxil olub. Braziliya mətbuatında yer alan informasiya həqiqəti əks-etdirmir. Kenedi “Valyadolid”in, “Bernard” isə “Panatinaikos”un əsas üzvüdü. Futbolçuların maaşlarının və yaşlarının çoxluğu Ağdam təmsilçisinə keçidlərinin alınmamasının əsas səbəbidi. Ümumiyyətlə, “köhlən atlar” bu futbolçularla maraqlanmayıb.

Redaksiyamıza “Qarabağ”ın transfer siyasəti ilə bağlı da maraqlı informasiya daxil olub. Ağdam təmsilçisi Avropada sözünü demiş, amma yaşı çox olan oyunçularla maraqlanmır. Dünya mətbuatında yer alan bu yöndə informasiyaların çoxu həmin futbolçuların qiymətinin və dəyərinin artırılmasına xidmət edir.

İLKİN SULTANLI