Konfrans Liqasında qrup mərhələsini təmin edən "Qarabağ"ın hədəfləri böyükdü.

"Köhlən atlar" Avropa Liqasında eyni uğuru təkrarlayaraq daha irəli getmək istəyir. Ağdam təmsilçisi qrup mərhələsindəki çıxışı üçün heyətini gücləndirmək niyyətindədi. Qurban Qurbanov komandadakı boşluqluqları doldurmaq, problemli mövqeləri bərpa etmək istəyir. Bu səbəbdən də son Azərbaycan çempionu transfer axtarışlarına başlayıb.

"Football-plus.az"a bununla bağlı informasiya daxil olub. Sən demə, "Qarabağ" Mateus Silva ilə maraqlanır. 25 yaşlı müdafiəçi "Lokomotiv"də (Plovdiv) çıxış edir.

Sağ cinah yarımmüdafiəçisi kimi də oynayan futbolçunun komandası ilə 2024-cü ilin yayına qədər müqaviləsi var. Onun sərbəstqalma dəyəri 500 min avrodu. Ağdam təmsilçisi bu məbləği ödəyərək futbolçununun keçidini sentyabrın 15-nə kimi həll etmək istəyir.

Qeyd edək ki, Mateus 2023/24 mövsümündə komandasının heyətində Bolqarıstan çempionatında 5 görüşdə 1 qol vurub. 25 yaşlı futbolçu karyerası ərzində "San Fransisko", "Paysandu", "Farense", "Baiya", "Moreyrense" kimi klublarda çıxış edib.

Nəzərinizə çatdıraq ki, "Qarabağ"da bu mövqedə çıxış edən Marko Veşoviç və Abbas Hüseynov zədəlidi. Düzdü, kapitan Maksim Medvedev də olsa da, Qurban Qurbanov Mateusun transfer edilməsini istəyib.

İLKİN SULTANLI