“Araz-Naxçıvan” premyer-liqada çıxış etməyə başladığı gündən futbol ictimaiyyətini yaxşı mənada təəccübləndirdi.

İndi Muxtar Respublika təmsilçisi oyun tərzi və mübarizə əzmi ilə seçilən komandalar sırasındadı. Baş məşqçi Azər Bağırov yerli və legioner futbolçuların vəhdətindən rəqiblərə “diş göstərən” heyət qurmağı bacarıb. Düzdü, hələ komandanın formalaşdırılması prosesi başa çatmayıb. Çalışdırıcının qəzetimizə verdiyi məlumata görə, daha bir hücumçuya ehtiyac var. Bu istiqamətdə bir neçə legionerlə danışıq aparılır.

“Qırmızı-ağlar” debütant olmalarına baxmayaraq, indiyə qədər bir neçə matçda qənaətbəxş nəticə əldə edib. Görəsən, indi “Araz-Naxçıvan”ın düşərgəsində vəziyyət necədi? Komanda hansı işlərlə məşğuldu? Daha yaxşı çıxış üçün hansı planlar qurulur?
Misli premyer-liqasının 4-cü turunda “Sumqayıt”la görüşdən öncə naxçıvanlıların futbolçusu Orxan Əliyevlə söhbətləşdik. O, yuxarıda qeyd olunanlarla yanaşı, başqa suallara da aydınlıq gətirdi.

- Yay fasiləsindən yararlanmaq mümkün olmadı. Futbolçuların çoxu məşqlərə gec qatıldı. Sonradan transfer edilənlərin sayı da az deyil. Lakin komandada elə ruh var ki, sanki uzun müddətdi bir-birinizi tanıyırsız. Həm xarakterinizə, həm də oyun tərzinizə bələdsiz...
- Düzdü, mövsüm başlamadan öncə xeyli vaxt itirdik. Əslində fasilə dönəmindən daha məhsuldar yararlanmaq istəyirdik. Bəzi məsələlər üzündən alınmadı. Amma ümidi itirib ruhdan düşə bilməzdik. Bilindiyi kimi, konkret hədəfimiz var. Konfrans Liqasına vəsiqə qazanıb ölkəmizi Avropada layiqincə təmsil etmək istəyirik. Hansısa çatışmazlığın bizə maneə yaratmasına imkan vermək doğru olmaz. Komanda ruhuna gəlincə, futbolçularla, sadəcə, məşq zamanı görüşmürük. Şükür Allaha, münasibətlərimiz çox yaxşıdı. Bir-birimizə zaman ayırırıq. Görüşlərimiz olur, birlikdə istirahət edirik, restoranlara gedirik. Həm də məşq qrafikimiz sıxdı. Oyun tempini itirməməyə və daha da inkişaf etməyə çalışırıq.

- “Araz-Naxçıvan”da xeyli legioner var. Bu sayın artması da istisna deyil. Azərbaycan çempionatında ilk dəfə iştirak etdikləri bəllidi. Bəlkə də çoxu daha əvvəl Bakıda olmayıb. Yeni şəhərə, yeni premyer-liqa ab-havasına uyğunlaşa bilirlər?
- Əlbəttə. Yuxarıda vurğuladığım görüşlərdə onlar da iştirak edir. Hamısı çox səmimi və mehribandı. Mətbəximizi bəyənirlər, dilimizi öyrənməyə çalışırlar. Düşünürəm ki, oyunlarda da yaxşı çıxış edirlər. Qarşıdakı həftələrdə daha güclü olacaqlar.

- Legioner demişkən, Miço Kuzmanoviç xüsusilə “Qarabağ”a vurduğu qoldan sonra çoxlu fanat qazandı. “Qəbələ” ilə görüşdə də iki məhsuldar ötürmənin müəllifi oldu. Ona tərif yağdıran mütəxəssislər də var. Hətta “Sabah”, “Neftçi” və “Qarabağ” azarkeşləri sosial şəbəkələrdə klublarına müraciət ediblər ki, Kuzmanoviçi transfer etsinlər.
- Komandadan ayrılmaq istəyib-istəmədiyini bilmirəm. Ona rəsmi təklif gələndən sonra bu haqda danışmaq olar. Həm güclü, intizamlı, əzmkar futbolçu, həm də çox yaxşı mənəvi keyfiyyətləri olan insandı. Hələ tam formaya düşməyib. Kuzmanoviç daha yaxşı çıxış edəcək.

- Hələ ki “Qarabağ”la görüşdə məhsuldar ötürməylə fərqlənmisən. Qol hesabında isə heç nə yoxdu. Özün haqda düşüncələrin necədi? Oyunun səni qane edir?
- Hər matça qol vurmaq üçün çıxıram. Ötən mövsüm olduğu kimi, bu dəfə də bombardirlər siyahısına düşmək istəyirəm. Hələ ki cəhdlərim faydasız alınıb. Bunun fərqindəyəm. Çalışıram ki, komandama daha çox xeyrim dəysin.

- Ev oyunlarını Bakıda, “Dalğa Arena”da keçirirsiz. Yəqin ki, Naxçıvandan ayrı düşmək ümumi işlərə təsirsiz ötüşmür...
- Təəssüf ki, stadionumuz hələ tam hazır vəziyyətə gətirilməyib. Fəaliyyətə Bakıda davam etməyə məcburuq. Hər hansı təsirin olub-olmadığını dəqiq deyə bilmərəm. Amma evdə daha çox azarkeş tribunalarda bizi dəstəkləyəcəkdi. Düzdü, Bakıda da xeyli “Araz-Naxçıvan” tərəfdarı var. Sağ olsunlar, hər oyuna gəlib son ana qədər yanımızda olurlar. Səbirsizliklə yenidən Naxçıvan şəhər stadionunda meydana çıxacağımız günləri gözləyirik.

- “Sumqayıt”la matça az qaldı. “Gənclik şəhəri” təmsilçisi ardıcıl iki qələbə qazanıb. Rəqib xüsusilə psixoloji baxımdan yaxşı əhvalda olacaq. Fiziki cəhətdən də qaneedici oyun tərzləri var. Görüşü necə qiymətləndirirsən?
- Heç kimdən qorxmuruq. Bunu “Qarabağ”la oyunda da sübut etdik. Hər iki hissədə yaxşı oyun göstərdik. “Sumqayıt” mövsümə yaxşı başlayıb. Həm futbolçuların, həm də baş məşqçi Samir Abasovun zəngin premyer-liqa təcrübəsi var. Amma bu bizi çəkindirmir. Meydana çıxıb qələbə uğrunda mübarizə aparacağıq. Qalib gələcəyimizə inanıram. Matça çox ciddi hazırlaşmışıq. Turnir cədvəlinin yuxarı pillələrində möhkəmlənmək üçün qarşıdakı oyunlarda sərfəli nəticə əldə etməyə məcburuq.

KƏNAN BAHADIR