Avqustun 23-24-də Konfrans Liqasında (KL) sonuncu təsnifat mərhələsinin ilk oyunları keçirildi. Pley-offun bir sıra sürpriz nəticələrlə başladığını demək mümkündü.

Qeyd edək ki, reytinqi ən yüksək olan ölkələrin təmsilçiləri KL-də mübarizəyə məhz pley-offdan başlayırlar. Avropanın “böyük beşlik” adlandırılan aparıcı liqalarından olan komandalar ilk matçlarda müxtəlif nəticələr göstərdilər.

“Lill” Fransada “Riyeka”nı (Xorvatiya) çətinliklə məğlub etdi - 2:1. Böyük Britaniya dueli tərəflərdən birinin böyükhesablı qələbəsi ilə nəticələndi. Şotlandiyada “Hibernian”nın qapısından 5 cavabsız top keçirən “Aston Villa”nın (İngiltərə) üç qolunu Uotkins vurdu. Unay Emerinin komandası artıq qrup mərhələsinin püşkünü gözləyə bilər. “Ayntraxt” Bolqarıstanda hesabı erkən açsa da, “Levski” son saniyələrdə məğlubiyyətdən qaça bildi. Fransalı yarımmüdafiəçi Fadiqanın 90+5-ci dəqiqədə vuduğu qol frankfurtluları qələbədən etdi. Vyanaya səfər “Fiorentina” üçün uğursuz alındı. Turnirin son finalçısı olan İtaliya komandası “Rapid”ə minimal hesabla uduzdu. İlk oyunlarda ən sürpriz nəticə isə İspaniyada qeydə alındı. Yerli “Osasuna” “Brügge”yə 1:2 hesabı ilə məğlub oldu. Çempionlar Liqasının ötən mövsümündə 1/8 finala qədər irəliləyən Belçika nəhəngi avrokubok təcrübəsinin necə əhəmiyyətli amil olduğunu pamplonalılara göstərdi.

Təəssüf ki, pley-off komandalarımızın iştirakı olmadan başladı. Təmsilçilərimiz 3-cü təsnifat mərhələsində uğursuzluğa düçar olmuşdular. “Neftçi” hər iki oyunda “Beşiktaş”a məğlub olmuş (1:3, 1:2), Bakıda “Partizan”ın qapısından iki cavabsız top keçirən “Sabah” isə Belqradda eyni hesabla uduzaraq sonda penalti seriyasında da uğursuzluğa düçar olmuşdu. Maraq üçün “Partizan”ın pley-offa da uğursuz başladığını qeyd edək. Serbiya nəhəngi Danimarkada “Nordşellann”a 5 cavabsız qolla uduzdu. “Beşiktaş” isə favorit statusunu “Dinamo”ya da göstərdi. Məlum səbəbdən Kiyevdə deyil, Rumıniyanın Buxarest şəhərində keçirilən matç istanbulluların 3:2 hesablı qələbəsi ilə nəticələndi. “Qarabağ”a Avropa Liqasının 3-cü təsnifat mərhələsində uduzan (1:2, 1:2) HİK KL-də uğursuz start götürdü. Finlandiyanın son çempionu “Farul”a Rumıniyada uduzdu – 1:2.

Ümumiyyətlə, pley-off postsovet məkanı üçün heç də yaxşı başlamadı. Bu mərhələdə sabiq SSRİ-yə daxil olan 4 ölkədən 6 komanda iştirak edir. Bu komandaların ilk oyunlardakı göstəriciləri belə oldu: 1 qələbə, 1 heç-heçə, 4 məğlubiyyət. Azarkeşlərini sevindirən heganə klub “Astana” oldu. Qazaxıstanın son çempionu öz meydanında “Partizani”ni (Albaniya) minimal hesabla məğlub etdi. Bu ölkənin digər təmsilçisi “Tobol” isə evdə “Viktoriya”ya (Plzen, Çexiya) 1:2 hesabıyla uduzdu. Ukraynanın digər klubu “Dnepr-1” isə Slovakiyada “Spartak” ilə heç-heçə etdi – 1:1. Postsovet məkanından olan daha iki komanda pley-offa uğursuz start verdi. “Ballkani” ilə Kosovoda baş tutan oyunda hesabı erkən açan BATE (Belarus) qalan vaxtda 4 top buraxaraq uduzdu. “Jalgiris” isə Litvada “Ferentsvaroş”a (Macarıstan) 0:4 hesabıyla məğlub olaraq qrupda oynamaq şansını möcüzəyə buraxdı.

pley-off, ilk oyunlar
Spartak (Slovakiya) – Dnepr-1 (Ukrayna) 1:1
Ofori, 55 – Pihalenok, 67-p.

Lill (Fransa) – Riyeka (Xorvatiya) 2:1
Jeqrova, 43. Yoro, 89 – Paşaliç, 24.

Hibernian (Şotlandiya) – Aston Villa (İngiltərə) 0:5
Uotkins, 17; 33; 48. Beyli, 42. Duqlas Luis, 74-p.

Levski (Bolqarıstan) – Ayntraxt (Frankfurt, Almaniya) 1:1
Fadiqa, 90+5 – Kolo Muani, 6.

Rapid (Avstriya) – Fiorentina (İtaliya) 1:0
Qrül, 35-p.

Osasuna (İspaniya) – Brügge (Belçika) 1:2
Avilya, 78 – Skov Olsen, 50. De Kuyper, 80.

Astana (Qazaxıstan) – Partizani (Albaniya) 1:0
Lonçar, 41.

Tobol (Qazaxıstan) – Viktoriya (Plzen, Çexiya) 1:2
Deble, 90+8-p. – Kadu, 73. Kalvax, 90.

Struqa (Şimali Makedoniya) - Breydablik (İslandiya) 0:1
Qyunnleyqsson, 35.

Jalgiris (Litva) – Ferentsvaroş (Macarıstan) 0:4
Traore, 17; 84. Varqa, 65-p. Peşiç, 75.

Nordşellann (Danimarka) – Partizan (Serbiya) 5:0
Frese, 11. İnqvartsen, 43-p.; 68-p. Villadsen, 73. İliç, 88-öz qapısına.

Dinamo (Ukrayna) – Beşiktaş (Türkiyə) 2:3
Şaparenko, 60. Voloşin, 66 - Abubakar, 40-p. Kolli, 64. Zaynutdinov, 90+5.

Makkabi (Təl-Əviv, İsrail) – Selye (Sloveniya) 4:1
Zahavi, 22-p.; 52; 72. Turceman, 90+2 – Bayde, 29.

Sepsi (Rumıniya) – Bude/Qlimt (Norveç) 2:2
Alimi, 48-p. Matey, 88-p. – Mumbanya, 19. Berq, 69.

Farul (Rumıniya) – HİK (Finlandiya) 2:1
Rivaldinyo, 59. Popsku, 83 – Sirbu, 50-öz qapısına.

Fənərbaxça (Türkiyə) – Tvente (Niderland) 5:1
Oostervolde, 33. Şimanski, 60. İrfan Can Kahveci, 63; 74. Tadiç, 90+3-p. – Uqalde, 20.

Genk (Belçika) - Adana Dəmirspor (Türkiyə) 2:1
Arokodare, 77. Munyos, 90+3 – Akbada, 47.

Gent (Belçika) - APOEL (Cənubi Kipr) 2:0
Fofana, 77. Hon Hyon Sok, 90+2.

Midtüllann (Danimarka) – Legiya (Polşa) 3:3
Juninyo, 16. Frankulino, 34; 71 - Qual, 26. Sliş, 64. Kramer, 84.

Alkmaar (Niderland) - Brann (Norveç) 1:1
Hatsidiakos, 77 – Kastro, 59.

Ballkani (Kosovo) – BATE (Belarus) 4:1
Yaşanitsa, 31. Tolyay, 58; 67. Taki, 89 – Laptev, 10.

Harts (Şotlandiya) – PAOK (Yunanıstan) 1:2
Şenklend, 9-p. – Şvab, 12-p. Jivkoviç, 75.

Cavab oyunları avqustun 31-də keçiriləcək.