Cümə axşamı Konfrans Liqasının (KL) da pley-offuna start verildi. Srağagün bu mərhələnin ilk görüşləri keçirildi.

Xatırladaq ki, ikinci mövsümü təşkil edilən KL-in qrup turniri ümumilikdə proqnozları doğrultmuşdu. Ancaq sürpriz də qeydə alınmışdı. Belə ki, D qrupunda “Nitsa” ilə “Köln”ün ilk iki yeri tutacağı ehtimal edilirdi. Fransa təmsilçisi qrupda 1-ci yerə sahib çıxıb. Lakin “Köln” bundesliqanın nüfuzuna xələl gətirib. Almaniya klubunun son turda “Nitsa” ilə evdə 2:2 hesablı “sülh”ə razılaşması fransalıların birbaşa 1/8 finala çıxmasını təmin etmişdi. “Partizan” isə “Slovatsko”dan bir xal (1:1) alaraq 2-ci yeri tutmuşdu. Qrup mərhələsinin yekunlarına əsasən, “Nitsa” kimi, “Vest Hem”, “İstanbul BŞ”, “Vilyarreal”, “Yurqorden”, “Alkmaar”, “Sivasspor” və “Slovan” da qrupunda liderliyi təmin etməklə turnirin ən güclü 8 iştirakçısı sırasına daxil olub. Bu komandalar birbaşa 1/8 finala vəsiqə qazanıblar. 6-cı turda qeydə alınan nəticələrdən sonra “Fiorentina”, “Anderlext”, “Lex”, “Partizan”, “Dnepr-1”, “Gent”, ÇFR və “Bazel” çıxış etdiyi qrupu 2-ci yerdə başa vurublar. Bu klublar mübarizəni turnirin pley-off mərhələsində davam etdirirlər. Onların rəqibləri isə “Qarabağ” kimi Avropa Liqasının (AL) qruplarında 3-cü yeri tutan komandalardı. Pley-offun qalibləri 1/8 finalda oynamaq hüququ qazanacaqlar.

KL-in bu mərhələsinin startı maraqlı nəticələrlə yadda qaldı. Diqqəti cəlb edən ilk məqam heç bir oyunda qarşılıqlı qolların qeydə alınmaması oldu. Yalnız bir matçda hesab açılmadı. Qalan 7 oyunda isə tərəflərdən biri top buraxmadan qalib gəldi. Özü də 6 oyun qalib tərəfin 1:0 hesablı qələbəsi ilə nəticələndi. Seviindiricidi ki, rəqibi üzərində minimal hesablı üstünlüyə nail olan komandalar sırasında “Qarabağ” da var. Amma Ramil Şeydayev penaltini qola çevirə bilsəydi, son çempionumuz “Gent”lə Belçikadakı cavab görüşünə daha rahat çıxacaqdı. İstənilən halda avrokubokların pley-offundakı yeganə təmsilçimiz evdə qələbə qazanmaqla üstünlük əldə edib.

İlk matçlarda yeganə böyükhesablı nəticə Portuqaliyada qeydə alındı. Yerli “Braqa” fasilə ərəfəsində “Fiorentina”dan qol buraxmaqla məğlub duruma düşdü. Artur Jorjenin komandası 55-ci dəqiqədə daha böyük zərbə aldı. Braziliyalı müdafiəçi Tormenanın birbaşa qırmızı vərəqə ilə cəzalanması braqalıların oyun planını tamamilə pozdu. Bundan isə daha 3 cavabsız qol vuran florensiyalılar maksimum yararlandılar.
Maraqlıdı ki, İtaliyanın digər təmsilçisinin oyununda da meydandan birbaşa qovulma qeydə alındı. “Latsio” Romada keçirilən ÇFR ilə matçın 15-ci dəqiqəsində ispaniyalı müdafiəçi Patrikin yolverilməz hərəkətinə görə meydanda on nəfərlə qaldı. Buna baxmayaraq, əzmkarlıq nümayiş etdirən “qartallar” fasiləyə bir neçə saniyə qalmış İmmobilenin qolu ilə hesabı açdılar. Mauritsio Sarrinin komandası qələbəni sonadək qoruya bildi. 64 yaşlı mütəxəssis matçdan sonra ingiltərəli Kreyq Pousonun avrokubok oyununu idarə edəcək səviyyədə hakim olmadığını deməkdən çəkinmədi.

Postsovet məkanından olan “Şerif” isə “Qarabağ”ın uğurunu təkrarlaya bilmədi. Moldova klubu evdə “Partizan”a uduzdu. Fasilə ərəfəsində hesabı açan serblərin müdafiəçisi Vuyaçiçin 50-ci dəqiqədə qırmızı vərəqə alması ev oyununu Kişinyovda keçirən tiraspolluların işinə yaraya bilərdi. Lakin “Neftçi”nin sabiq italiyalı baş məşqçisi Roberto Bordinin çalışdırdığı komanda çoxluqda oynasa da, məğlubiyyətdən qaça bilmədi. “Dnepr-1” də pley-offa eyni nəticə ilə başladı. Ukrayna klubu Larnakada AEK-ə minimal hesabla uduzdu.

pley-off, ilk oyunlar

QARABAĞ - Gent (Belçika) 1:0
Leandro Andrade, 78.
Braqa (Portuqaliya) - Fiorentina (İtaliya) 0:4
Yoviç, 45+1; 60. Kabral, 79; 90+1.
Latsio (İtaliya) - ÇFR (Rumıniya) 1:0
İmmobile, 45+4.
Trabzonspor (Türkiyə) - Bazel (İsveçrə) 1:0
Strüger Larsen, 65.
Bude/Qlimt - Lex (Polşa) 0:0
Şerif (Moldova) - Partizan (Serbiya) 0:1
Rikardo Qomeş, 45.
AEK (Cənubi Kipr) - Dnepr-1 (Ukrayna) 1:0
A.Qarsiya, 84.
Ludoqorets (Bolqarıstan) - Anderlext (Belçika) 1:0
Tyaqo, 9.

Cavab oyunları fevralın 23-də keçiriləcək.

Bombardirlər: Yoviç (Fiorentina) – 6, Dovbik (Dnepr-1) - 5, Baena, Morales (hər ikisi “Vilyarreal”), Dyabate, Rikardo Qomeş (hər ikisi “Partizan”), İşak, Skuras (hər ikisi “Lex”), Çavriç (Slovan) - 4.