“Xoş gəlmisən, Kofi Anan, xoş gəlmisən, Anan Kofi. Çay içirsən, yoxsa kofe?” - “Bakılı oğlanlar”ın konsertlərində belə bir səhnəcik var idi.

Şən və hazırcavab oğlanlar BMT-nin o vaxtkı baş katibi Kofi Ananı məhz belə yamsılayır, izləyicilərin üzünü güldürməyə çalışırdılar. Mənim yadıma bu misralar “Neftçi”nin fransalı müdafiəçisi Ervin Koffinin oyununu izlədikcə düşür. Adamın etdiyi səhvlərin sayı-hesabı yoxdu. “Beşiktaş”la Bakıdakı oyunda İstanbul klubunun üçüncü qolunun “məhsuldar ötürməsi” məhz ondan gəldi. Elə “qara qartallar”ın ikinci oyunda vurduğu qollarda da Koffinin “əməyi” danılmaz idi.

Onun “əsrarəngiz oyununun” davamını Masazırda izlədik. Jarl Marqarita Ataa Caberin başını gicəlləndirib onu yeri sərir. Azarkeşlər bu möhtəşəm driblinqdən zövq almaqdaykən top cəmi iki dəqiq ötürmədən sonra Boyan Letiçin önünə düşür. Sağ cinah müdafiəçisi Ervin Koffi də komanda yoldaşı Caber kimi mövqeyini də, başını da itirmiş durumda olduğundan serbiyalıya mane olacaq vəziyyətdə deyil. Belədə topu rahatlayan Letiç onu qüvvətli zərbə ilə təcrübəsiz Rza Cəfərovun qorumalı olduğu yaxın küncdən tora qovuşdurur. “Sabah”ın turun mərkəzi qarşılaşmasında hesabı açdığı epizodun sadə icmalı bundan ibarətdi. Mövqeyində oynadılmayan Caberin və mövqeyində oynadılsa da, əlindən-ayağından bir iş gəlməyən Koffinin “Sabah”ın ildırımsürətli hücumuna mane ola bilmədiyini qarşılaşmanı izləyən hər kəs gördü. Türkün sözü, peki, bu adamlar nə üçün belə səhvlərə yol verir? Caber mövqeyində oynadılmadığına görə səhvə yol verir, Koffi isə çətin məqamların oyunçusu olmadığını hər imkandaca ortaya qoyur.

“Neftçi”də qərarları kim verir? Məşqçilər, yoxsa azarkeşlər? Mutunun sərəncamında milli komandamızın üzvü, tək-tük normal cinah müdafiəçilərindən olan Azər Salahlı var. Nədənsə sosial şəbəkə istifadəçiləri və “Neftçi”nin bir qrup azarkeçi yerli futbolçunu “qaraladılar”, kütləvi surətdə ona qarşı psixoloji terrora başladılar. Nəticəsi də o oldu ki, Mutu Salahlını oynatmır, Ataa Caberdən sol cinah müdafiəçisi düzəltməyə çalışır. Bərəkallah ustadına, ay Mutu. Peşəkar məşqçi belə olur? Caberin 29 yaşı var, sən bundan sonra ondan cinah müdafiəçisi necə düzəldəcəksən? Nə üçün başqaları dəfələrlə səhv edir, amma onların əsas heyətdəki yeri toxunulmazdı. Koffinin səhvə yol vermədiyi oyun yoxdu. Özü də bu səhvlərin hamısı “Neftçi”nin qapısına vurulan qolla nəticələnib. Olmaya, Gəncədəki məğlubiyyəti təkcə Salahlının rəqiblə toqquşan ayağına yazıb, özünüzü bulanıq sudan quru çıxarmaq fikrindəsiz? Belə olmaz, cənablar. Bu davranış nə vicdana sığır, nə də peşəkarlığa. Cəmi 15 gündən sonra Azərbaycan millisi çətin oyunlara çıxacaq. Amma milli komandanın vacib futbolçuların biri kimlərinsə şəxsi maraqlarına görə oyun təcrübəsindən məhrum olunur.

Hər səhv edən futbolçunun yeri baş məşqçinin yanında, yəni ehtiyat oyunçular skamyasında olsa, gərək Koffi heç meydan üzü görməyə. Hələ mən qol hesabını aça bilməyən hücumçularınızdan danışmıram. “Beşiktaş”ın qapısına yarımmüdafiəçi yol tapır, “Səbail”ə penaltidən qol vurursuz, “Sabah”la oyunda isə avtoqolla təsəlli tapıb, bir xala sevinirsiz. Diqqətinizə çatdırım ki, “Neftçi”nin iştirak ərizəsində üç əcnəbi hücumçu yer alıb. Bu mövsüm premyer-liqada ikisi autsayderlə oyun olmaqla üç qarşılaşmada meydana çıxan hücumçular hələ qol hesabını açmayıblar. Uyğunlaşma, zaman ehtiyacı kimi nağıllarla azarkeşləri uyutmağa da çalışmayın. Hərgah “Neftçi”nin dəyərli azarkeşləri də bəzi həssas məsələlərdə ağa qara, qaraya isə ağ deməklə elə Mutunun və rəhbərliyin çörəyinə yağ sürtməkdədi.

Bəli, “Neftçi” avtoqol sayəsində “Sabah”la əldə edilən bərabərlikdən az sonra Türkiyə superliqasının debütantı “Pendikspor” da “Beşiktaş”dan xal aldı. Özü də “Neftçi”nin məğlub qayıtdığı stadionda və nəticəsi vacib olan bir qarşılaşmada. Ümid edirəm ki, Mutunun bu görüşün nəticəsindən xəbəri oldu. Demişdi axı “Beşiktaş” kimi rəqiblərlə Çempionlar Liqasında qarşılaşırsan. Göründüyü kimi, “qara qartallar” heç də deyilən dərəcədə qorxulu deyilmiş. Yetər ki, onu gözündə böyütməyəsən, özün böyük olmağa çalışasan. Elə “Pendikspor” kimi. Arada onlardan öyrənin, onlar kimi cəsarətli olmağa çalışın.

AMAL