Avqustun 10-u Türkiyə klubları üçün uğurlu alındı: ölkəni Konfrans Liqasında təmsil edən hər üç klub cümə axşamı azarkeşlərini qələbə ilə sevindirdilər.

"Football-plus.az" xəbər verir ki, “Beşiktaş” Bakıda “Neftçi”ni 3:1 hesabıyla üstələdi. “Fənərbaxça” “Maribor”u eyni hesabla öz meydanında məğlub etdi. Doğrudu, istanbullular matçın əvvəlində bir qədər çətinə düşdülər. Rəqib onların oyununu pozmağı yaxşı bacarırdı. Hesabın açılmaması isə yerli azarkeşlərin İrfan Can Kahvecini fitə basması ilə müşayiət olundu. İsmail Kartalın çalışdırdığı komanda sloveniyalıların müqavimətini yalnız fasilədən sonra qıra bildi. Yeni oyunçulardan Rodriqo Bekao 58-ci dəqiqədə hesabı açdı, 4 dəqiqə sonra İrfan Can Kahveci ikinci qolu vurdu. Hər iki epizodda məhsuldar ötürməni meydana ikinci hissədə şıxan istanbulluların daha bir yeni futbolçusu Şimanski verdi. “Maribor” 10 dəqiqə sonra fərqi azaltsa da, matçın son dəqiqələrində Tadiç penalti ilə “Fənər”in qələbəsinə şübhə yeri qoymadı.

“Adana Dəmirspor” isə “Osiyek”i evdə 5:1 hesabıyla darmadağın etdi. Patrik Klyuvertin komandası Xorvatiyada gələn həftə keçiriləcək cavab görüşünə bir qədər rahat çıxa bilər.

3-cü təsnifat mərhələsi, ilk oyunlar
NEFTÇİ – Beşiktaş 1:3
Fənərbaxça – Maribor (Sloveniya) 3:1
Rodriqo Bekao, 58. İrfan Can Kahveci, 62. Tadiç, 90+3-p. – Straynar, 72.
Fənərbaxça: Altay Bayındır, Luan Peres, Osayi-Samuel, Rodriqo Bekao, Zayts (Krespo, 66), İrfan Can Kahveci (Kent, 83), Fərdi Kadıoğlu, İsmail Yüksək, Ceko (Batşuayi, 67), Tadiç, Kinq (Şimanski, 46).
Adana Dəmirspor – Osiyek (Xorvatiya) 5:1
Svensson, 3. Yusuf Sarı, 16. Ş.Ndiaye, 51; 67-p. Yusuf Ərdoğan, 88 – Qrjan, 73-p.
Adana Dəmirspor: Karaciç, Svensson, Rodriges, Semih Gülər (Abdulsamet Burak, 71), Manev, Belhanda, Stambuli, Əmrə Akbaba (Dorukhan Toköz, 70), Akintola (Nani, 46), Yusuf Sarı (Yusuf Ərdoğan, 80), Ş.Ndiaye (Nyanq, 87).

Oyundan sonra
İsmail Kartal, “Fənərbaxça”nın baş məşqçisi: “Matçın çətin keçəcəyini bilirdik. Rəqib təşkilatlanmış komandadı. Biz isə dərsimizə yaxşı hazırlaşmışdıq. İlk 15 dəqiqə rəqibin üstünlüyü ilə keçdi. Bekaonu orta xəttə çəkməklə təşəbbüsü ələ keçirdik. Sloveniyalılar vaxtı uzatmaq istədilər. Onların bizi kifayət qədər yorduqlarını söyləyə bilərəm. Matçın əvvəlində və gedişində üzləşdiyimiz çətinlikləri həll etmək əla oldu. Sonda qalib gəldik. Buna görə oyunçularımı təbrik edirəm. Azarkeşlərin İrfan Can Kahveciyə etdikləri etiraza gəlincə, oyunun gedişində hesabda geri düşə bilərdik. Bu futboldu. Fanatlar səbirli olmalıdılar. Onların komandaya dəstək verməsi vacibdi. Azarkeşlərin oyunun sonuna qədər komandamızı və oyunçularımızı dəstəkləməsini istəyirəm. Uzun bir marafona başlayırıq. Bütün oyunçulara ehtiyacımız var. Mən “Fənərbaxça”lıyam. “Fənərbaxça”nın tribunadan gələn övladıyam. Mənə dəstəyinə görə bütün camiəyə təşəkkürümü bildirirəm. Əvəzində klubun bazasında gecə-gündüz çalışıb sevgi və hörmətin əvəzini uğurlu nəticələr və çempionluqla vermək istəyirəm”.

İrfan Can Kahveci, “Fənərbaxça”nın yarımmüdafiəçisi: “Ötən mövsüm də belə açıqlama verməyə məcbur olmuşdum. İndi isə yeni mövsüm ərəfəsindəyik. Matç sona çatmadan etiraz etmək lazım deyil. Heç narahat olmasınlar, mənə güvənənləri bilir və görürəm. İsmail hoca ilə yaxşı ab-hava yaxalamışıq. İnşallah, mövsümün sonunda tərəfdarlarımızın həsrət qaldığı hədəfə nail olacağıq. Vurduğum qol mənim üçün o qədər də əhəmiyyətli deyil, təki komanda qalib gəlsin. Mən statistika ilə maraqlanmıram. Mənim üçün yalnız “Fənərbaxça”nın çempion olması önəmlidi”.

Patrik Klyuvert, “Adana Dəmirspor”un baş məşqçisi: “Bu axşam çox xoşbəxtəm. Komandamızın bu çıxışı indiyədək gördüyümüz işlərin bəhrəsidi. Rəqibin qamımız istiqamətində zərbə endirə bilməməsi sevindiricidi. Bu planda onlara imkan vermədik. Belə oyunu Xorvatiyada da oynasaq, növbəti mərhələyə çıxa bilərik. Ancaq oyunçularım yalnız bu gün sevinə bilərlər. Ona görə ki, hələ mərhələni adlamamışıq. Nəyisə bacarmaq üçün daha çox çalışmalıyıq. Bizi artıq bazar günü “Çaykur Rizəspor” ilə növbəti oyun gözləyir. Ona görə sabahdan bu matç üçün hazırlığa başlayacağıq ”.