Vəssalam-şüttamam, müdafiəçi Yoşko Qvardiol “Mançester Siti”yə keçdi.

“Football-plus.az” xəbər verir ki, “Leyptsiq” 21 yaşlı xorvatın transferindən 90 milyon avro qazandı, əlavə 10 milyon bonus ödəniləcəyini xəbər verən qaynaqlar da var. Müqavilə 5 il üçün nəzərdə tutulub.

Yoşko “Siti”nin bu yay üçün prioritet hədəflərindən biri idi, danışıqlar maydan bəri davam edirdi. “Leyptsiq” konkret 100 milyon tələb etsə də, futbolçunun top-kluba keçmək arzusu hədsiz böyük olduğundan qiyməti bir qədər endirmək mümkün oldu. Çox güman, indi Qvardiol doqaqlarının altında “necə gözəl soyaddı” deyə qımışır. Beləliklə, Qvardioal tarixdə ən baha müdafiəçiyə çevrildi. Aşağıdakı siyahıda məbləğlər avro ilə göstərilib.

oyunçu il hardan hara qiymət
1. Yoşko Qvardiol 2023 Leyptsiq Mançester Siti 90 milyon
2. Harri Maquayr 2019 Lester Mançester Yunayted 87 milyon
3. Matteys de Liqt 2019 Ayaks Yuventus 85,5 milyon
4. Vircil van Diyk 2018 Sauthempton Liverpul 84,6 milyon
5. Uesli Fofana 2022 Lester Çelsi 80,4 milyon
6. Lüka Ernandes 2019 Atletiko Bavariya 80 milyon
7. Ruben Diaş 2020 Benfika Mançester Siti 71,6 milyon
8. Əşrəf Hakimi 2021 Marsel PSJ 68 milyon
9. Matteys de Liqt 2022 Yuventus Bavariya 67 milyon
10. Mark Kukurelya 2022 Brayton Çelsi 65,3 milyon
İndiyə qədər heç bir müdafiəçiyə görə bu qədər pul ödənilməmişdi.
•‎ Əvvəlki rekordçu Harri Maquayr idi. 2019-un yayında “Mançester Yunayted” “Lester”ə bu futbolçuya görə 87 milyon avro ödəmişdi. İngiltərəli müdafiəçi 4 il liderliyi qorudu.

• Üç il əvvəl “Mançester Siti” Ruben Diaşa görə 72 milyon avroya yaxın pul ödədi. Hərçənd portuqaliyalılar daha çox istəyirdi. Nikolas Otamendini sövdələşməyə daxil etməklə qiyməti endirmək mümkün oldu. İndi Diaş ən baha müdafiəçilərin siyahısında yeddincidi.

• “Top-10”dan kənarda isə “Siti”nin iki oyunçusu – Emerik Lyaport və Joao Kanselo bir-birinin ardınca qərarlaşıb. Onların hər birinə görə 65 milyon avro ödənilib. Uyğun olaraq, “Atletiko” ilə “Yuventus”a.

• Maraqlıdı ki, Matteys de Liqt iki dəfə ən baha müdafiəçilərin ilk “10-luğ”una düşüb: niderlandlı “Yuventus”a transferin ardından bir ay zirvədə qərarlaşdı, ancaq sonra Maquayrın keçidi baş tutdu. “Bavariya” üçillik “Yuventus” karyerasının ardından Matteysi nisbətən aşağı məbləğə aldı.

“Siti” yenə müdafiəçiyə çox pul xərcləyir

Aşağıdakı siyahı Pep Qvardiolanın heyətin komplektləşdirilməsindəki prioritetlərini açıq-aydın göstərir. Qiymətləndirmə zamanı müxtəlif amilləri nəzərə almaq lazımdı. Qiymət təkcə futbolçunun keyfiyyətindən yox, həm də onun əlçatanlığından, başqa top-klubların maraq dairəsində olub-olmamasından asılıdı.

Qvardiolanın 2016-23 aralığında MS-də hər mövqe üçün xərclədiyi pul
1 2 3
dayaq yarımmüdafiəçisi 3 43,3 milyon
mərkəz müdafiəçisi 10 37,8 milyon
vinger 9 33,3 milyon
hücumameyilli yarımmüdafiəçi 2 26,2 milyon
cinah müdafiəçisi 9 26,1 milyon
mərkəz hücumçusu 5 24,7 milyon
mərkəz yarımmüdafiəçisi 7 11,6 milyon
qapıçı 6 11,6 milyon
1 – mövqe, 2 – oyunçu sayı, 3 - hər transferin orta qiyməti.

• Mərkəz müdafiəçisi – MS-nin transfer zamanı üstünlük verdiyi ən populyar ampluadı. Pepin dönəmində komandaya 10 belə oyunçu gəlib. Ən ucuzu “Ximnastik”dən 2 milyona alınan Pablo Maridi. Premyer-liqada heç cür möhkəmlənə bilmədi, baxmayaraq ki, “Arsenal”da da sınandı.

• Qvardiola mərkəz müdafiəçilərindən daha çox yalnız dayaq yarımmüdafiəçilərinə pul xərcləyir – 43,3 milyon avro. Ancaq bu mövqedə oynayan yalnız üç futbolçu gəlib, odu ki, müqayisə yersizdi.

• Maraqlıdı ki, Qvardiola mərkəz yarımmüdafiəçilərinə də qapıçılar qədər az xərcləyir. Yalnız yaxınlarda “Çelsi”dən 29,1 milyona alınan Mateo Kovaçiç bu mənada çərçivəni bir qədər qaldırdı.

• Bəli-bəli, Pep dönəmində cəmi 6 qapıçı transfer olunub. Sayaq: Ederson, Klaudio Bravo, Zak Steffen, Xeronimo Rulyi, Stefan Orteqa, Skott Karson.

Qvardiolanın özəlliklərinə gəlincə, topla oyun baxımından dünyanın ən güclü mərkəz müdafiəçilərindən biridi. Bundan başqa, qol vurmaq bacarığı da var. Qvardiol ən baha müdafiəçi, ən baha xorvatdı, lakin bu yayın ən baha transferi deyil.

• Deklan Rays liderliyi hələ də qoruyur – o, “Arsenal”a 116 milyon avroya başa gəlib. Deklanı yalnız bir potensial transfer qabaqlaya bilər. Təbii ki, söhbətin hansı fransalı futbolçudan getdiyini siz də bilirsiz.

• 2-ci yerdə də ingiltərəli – Cud Bellingem qərarlaşıb. “Real” ona görə 103 milyondan keçib.

• İlk “10-luq” İngiltərə premyer-liqasının bazardakı dominantlığını açıq-aydın göstərir. Yalnız üç transfer İngiltərədən kənarda gerçəkləşib: Cud, Manuel Uqartenin “Sportinq”dən PSJ-yə keçidi, Malkomun “Zenit”dən “Əl-Hilal”a gedişi.

• “Leyptsiq” bu yay artıq 220 milyon avro qazanıb: Yoşko ilə yanaşı, klubu Kristofer Nkunku (“Çelsi”yə gedib) və Dominik Soboslai (“Liverpul”a gedib) tərk edib.