Ötən həftə ölkə futbolunun daha bir tanınan siması 50 yaşını tamamladı. Əsri yarılayan "Neftçi"nin, “Qarabağ”ın və yığmamızın veteran futbolçusu Bəxtiyar Musayevdi.

"Football-plus.az" olaraq yubilyara cəmi 5 sual ünvanladıq.

- Əsrin yarısına çatdız. Geriyə baxanda nə deyərdiz?
- Yalnız şükür edirəm. İstər karyerama, istər şəxsi həyatıma, istərsə də bugünümə görə Allaha sonsuz minnətdaram. Yaxşı ailəm və oğlum var. Övladlarım həmişə başımı uca edib.

- Bəxtiyar Musayev futbolçu karyerasından razıdımı?
- Azərbaycan səviyyəsindəki karyeramı pis saymıram. Əksər futbolçular kimi milli komandada çıxış etmişəm. Hətta bəzi oyunlarda ölkənin əsas komandasını kapitan kimi də çıxarmışam. Futbolun inkişafı baxımından o dönəmi nəzərə alsaq, bizim üçün çox çətin olub. Doğru-dürüst təlim-məşq toplanışları keçməmişik, 4-5 topla həm məşq edir, həm də oyunlar keçirirdik. İdman və oyunlar üçün paltar tapmırdıq. Stadionlarımız bərbad gündəydi. İnventarlar olduqca pis vəziyyətdəydi. Düşünürəm ki, daha yaxşı şəraitdə oynasaydıq, karyeramız tam fərqli olardı. Amma şükürlər olsun ki, çətinliklər içində bacardıqca normal futbolçu olmağa çalışmışıq. 32 yaşımda futboldan getdim, vaxtında karyeramı bitirdiyimi düşünürəm.

- Ən yaddaqalan oyununuz hansıdı?
- Çox belə oyunun olub. Amma birini xatırlamaq lazımdısa, Portuqaliya ilə Bakıda 1:1 etdiyimiz oyunu deyərdim.

- Vurduğunuz xüsusi, vacib qol?
- Qol vurmaq, məhsuldar ötürmə vermək çox xoş haldı. Tam səmimi deyirəm: vurduğum qolların və komanda yoldaşlarımın fərqlənməsi üçün assistlərimin hər birini dəyərli sayıram. Hər qolumda və qol ötürməmdə özümü xöşbəxt hesab etmişəm.

- Yenidən dünyaya gəlsəz, futbolçu olmağı seçərdizmi?
- Yaxşı ki futbolçu peşəsini seçmişəm və sevdiyim işlə məşğul olmuşam. Yaşıl meydanda top qovduğum illərdə pis də, yaxşı da yaşantılarım olub. Futbolun sayəsində çox şey öyrənmişəm. Hazırda da futbolun içindəyəm və bundan qürur duyuram. Odu ki, yenidən dünyaya göz açsaydım, yenə futbolçu olmağı seçərdim.

ABDULLA İSMAYILOĞLU