Bu gün “Neftçi”nin və Azərbaycan yığmasının hücumçusu Vadim Vasilyev 50 yaşını tamamlayır.

Ötən əsrin 90-cı illərinin sonunda və yeni əsrin əvvəlində ölkə futbolunda dəbi müəyyənləşdirənlərdən olan, heç nədən qol vurmağı bacaran biri bu gün gözdən-könüldən uzaq düşüb. “Football-plus.az” saytı olaraq, səbəbkarı aradıq, təbrik etdik və bir neçə sual ünvanladıq.

- Vadim, səni 50 yaşının tamamı münasibəti ilə təbrik edir, uzun ömür, cansağlığı arzulayırıq.

- Çox sağ ol, qardaş. Minnətdaram.

- Futbolçu dostlarından təbrik edən oldumu?

- 20-yə yaxın dost zəng edib, təbrikini çatdırıb. Adlarını bir-bir açıqlamaq istəmirəm.

- Bəs çıxış etdiyiniz klublardan hansı təbrik edib?

- Yalnız "Neftçi"dən təbrik almışam. O da telefon vasitəsi ilə.

- Futbolçu karyeran boyunca bir çox klubda oynamısan. Onlardan hansı sənin üçün unudulmazdı?

- Təbii ki, "Neftçi"

- Bəs yığmada ən yaddaqalan oyunlar?

- Portuqaliya ilə 1-1-lik heç-heçə və Türkuyə ilə qolsuz bərabərlik.

- Yarım əsri arxada qoydunz. Geriyə baxanda "kaş futbolu yox, başqa peşəni seçəydim" demisən?

- Heç vaxt! Yenidən dünyaya gəlsəm, yenə futbolçu olmağı seçərdim.

- Veteran kimi Azərbaycan futbol camiəsindən gözləntiləriniz nədi?

- Özüm üçün heç bir gözləntim yoxdu (gülür). Amma futbolumuzun inkişahı üçün aidiyyatı qurumlara səslənirəm ki, uşaq futbolunu dirçəltsinlər, istedadlı gənclərimizi aparıcı liqalara daşısınlar.

ABDULLA İSMAYILOĞLU