Ayşən Əhmədova: "PAOK-un hədəfləri məni cəlb etdi"
Qadın futbolçulardan ibarət millimizin müdafiəçisi Ayşən Əhmədova karyerasını Yunanıstan PAOK-unda davam etdirəcək.
Bununla bağlı 23 yaşlı oyunçu ilə əlaqə saxladıq. Əhmədova "Football-plus.az"a bunları dedi:
"3 il idi Türkiyədə çıxış edirdim. Fərqlilik etmək istəyirdim. Avropanın başqa klublarında çıxış etmək məqsədim var idi. Menecerim PAOK-dan təklif olduğunu bildirdi. Mən də razılaşdım. Həm də onlar son ölkə çempionudular. Düşünürəm ki, bu komandaya keçməyim karyeramda irəli getmək üçün böyük addım olacaq".
Əhmədova başqa klublardan təklifin olub-olmadığı barədə də fikilərini bildirdi:
"Başqa klublardan istəyənlər var idi. Məsələn, Türkiyə, Cənubi Amerika və digər ölkələrdən təkliflər gəlirdi. Lakin PAOK-un hədəfləri məni cəlb etdi. Burda olduğum üçün xoşbəxtəm".
O, milli komandanın Millətlər Liqasının seçmə mərhələsində Cənubi Kipr və Monteneqroya qarşı keçirəcəyi oyunlar barədə də danışdı:
"Əsas hədəfimiz qrupdakı bütün matçlarda qələbə qazanmaqdı. Planımızı buna görə qururuq. Bizim üçün bu oyunlar çox vacibdi. İstəyirik ki, yığma ilə nəticə əldə edək. İnşallah, məqsədimizə çatacağıq".
Gənc futbolçu milli komandanın son illərdə inkişaf etdiyi fikrindədi:
"Düşünürəm ki, son illər milli komanda çox inkişaf edib. Bunu keçirdiyimiz oyunlardan da görə bilərsiz. Həmçinin heyətimizdəki qızlar da legioner həyatı yaşayır. Bu da bizim üçün böyük amildi".
CAVİD ƏLİYEV
Digər xəbərlər
