“Mançester Siti” iki futbolçusu ilə müqaviləni yeniləyib. Rodri ilə Riyad Mahrez İngiltərə çempionunun formasını daha bir neçə il daşıyacaqlar.

Football-plus.az xəbər verir ki, Rodri ilə müddəti 2027-ci ilə qədər nəzərdə tutulan yeni sözləşmə imzalanıb. 26 yaşlı yarımmüdafiəçi MS-də 2019-cu ildən oynayır. O, ötən mövsüm premyer-liqada iştirak etdiyi 33 matçda 7 qol vurub və 2 məhsuldar ötürmə edib.

Mahrezin müqaviləsinin müddəti isə 2025-ci ilə qədər artırılıb. Əvvəlki sözləşməsi 2023-cü ilin yayına qədər nəzərdə tutulan hücumçu PSJ, “Yuventus” və “Real”ın maraq dairəsindəydi. Lakin rəhbərlik onunla yeni mövsüm başlamazdan əvvəl razılığa gələ bilib. Qeyd edək ki, əlcəzairli futbolçu son mövsüm bütün turnirləri nəzərə almaqla komandada hamıdan çox – 24 qol vurub. 31 yaşlı Riyad “Siti”də 2018-ci ildən çıxış edir.

Əlavə edək ki, MS Emerik Lyaportu “Çelsi”yə satmaqdan imtina edib. “Evening Standard” qəzetinin məlumatın görə, rəhbərlik ispaniyalı müdafiəçi üçün göndərilən təklifi mənfi cavablandırıb. Lyapor ötən mövsüm 44 oyuna çıxıb və 4 qol vurub.