Belə görünür ki, RFŞ – “Sabah” oyunu ətrafında yaşanan ciddi münaqişə mənbəyinə çevriləcək. “Football-plus.az” xəbər verir ki, Latviyanın “Sportacentrs.com” saytı bu mövzuya geniş yer ayırıb. Həmin yazını təqdim edirik.

Latviya Futbol Federasiyasının prezidenti (LFF) Vadim Laşenko portalımıza təsdiqlədi ki, UEFA Azərbaycan klubu “Sabah”ın Konfrans Liqası çərçivəsində RFŞ ilə oyunu Latviyadan başqa ölkəyə keçirməklə bağlı müraciətinə baxır. LFF prezidentinin dediyinə görə, “Sabah”ın bəzi təmsilçilərinin zəruri Şengen vizası yoxdu, ancaq bu RFŞ-in ev oyununu başqa yerdə keçirməsi üçün əsas ola bilməz: “UEFA rəhbərliyi ilə fəal əlaqədəyik. Əlbəttə, biz çalışırıq ki, oyunun yeri dəyişməsin. Mövcud durum heç bir şəkildə RFŞ-in məsuliyyəti ilə bağlı deyil və şəxsi fikrim belədi ki, RFŞ ev oyununu başqa yerdə keçirməməlidi”.

Oyuna az qalmış yerinin dəyişməsi ilə bağlı variantlara gəlincə, Laşenko ehtiyatlı danışdı, bunun UEFA-nın məsələsi olduğunu, avropalı həmkarlarının əvəzinə danışa bilməyəcəyini dedi: “Ancaq nəzərə almaq lazımdı ki, dörd ölkə arasında razılaşma var – Polşa, Litva və Estoniya da ölkəyə girişlə bağlı Latviya kimi qanunlara malikdi. Bu isə o deməkdi ki, UEFA oyunu başqa yerə keçirməyə razılıq versə, bu ölkələrdən heç biri ola bilməz. Hazırsa başqa potensial variantlar müzakirə olunmur”.

Portalımız RFŞ klubunun rəhbərliyi ilə əlaqə saxlaya bilməsə də, Laşenkonun dediyinə görə, LFF nümayəndələri həm bu klub, həm də UEFA ilə müntəzəm əlaqə saxlayırlar: “UEFA-nın vəziyyəti necə dəyərləndirəcəyini proqnozlaşdıra bilmərəm, top indi onların tərəfindədi. Ancaq vəziyyət belədi ki, Latviya qanunlarına görə təcavüzkar ölkənin – Rusiyanın vətəndaşlarına müvafiq Şengen vizası oladam Latviyaya giriş qadağandı. Söhbət D kateqoriyalı və ya uzunmüddətli vizalardan gedir, “Sabah”ın təmsilçilərinin isə qısamüddətli C kateqoriyalı vizası var. D kateqoriyalı vizalar əsasən Rusiya vətəndaşlarına qohumluq əlaqələrinə və işə görə verilir. Avrokubok oyununda iştirak nəzəri cəhətdən “iş” təyininə uyğun gəlir, ancaq “Sabah”ın baş məşqçisi Murad Musayev, köməkçiləri, komandanın analitiki və iki futbolçusu (Camal Cəfərov və Rüstəm Samiqullin) yalnız C kateqoriyalı vizaya malikdi. Bu artıq Latviya Sərhəd Xidmətinə aid məsələdi. Əlbəttə, Latviyanın milli qanunları prioritetdi, UEFA ilə danışıqlarda da bu məqamı vurğulayırıq”.

“Sportacentrs.com”da olan informasiyaya görə, “Sabah” məsələni belə qoyub ki, bütün nümayəndələri Latviya ərazisinə daxil ola bilməsə, ümumiyyətlə, komanda oyuna gəlməyəcək. UEFA-nı oyunun yerini dəyişməyə məcbur etmək üçün uğurlu taktikadı. UEFA-nın qarşıdakı saatlar ərzində LFF-ni və klubları qərarından xəbərdar edəcəyi gözlənilir.

ORXAN