PFL rəsmisi narazı klublara cavab verdi, Vaqif Sadıqov həvəsləndirici layihələrin tərəfdarıdı
PFL bu həftə müzakirələrə səbəb olan qərar açıqladı. Futbol ictimaiyyətinə bildirildi ki, premyer-liqa, 1-ci liqa və əvəzedicilərin yarışında ikinci və üçüncü yerləri tutan komandalara medallar təqdim olunmayacaq. “Niyə” sualının cavabı isə belə oldu: “Beynəlxalq təcrübədə bununla bağlı araşdırma apardıq və nəticəyə gəldik ki, ancaq çempionlara qızıl medalların verilməsi məqsədəuyğundu. Eyni zamanda, jurnalistlər mükafatlandırma üçün mövsümün son oyununu gözləmək məcburiyyətində qalmayacaq”.
Görəsən, jurnalistlər üçün mükafatlandırma mərasiminin vaxtı nə qədər əhəmiyyətlidi? Bu başqa yazının mövzusudu. Hazırda əsas məsələ bəzi klubların qərardan narazı qalmasıdı. Bu haqda yazını qəzetimizin ötən sayında dərc etmişdik. Düzdü, premyer-liqa klubları buna etiraz etmədi. Yəqin ki, ölkə çempionatında ilk “4-lüy”ə düşmək, avrokuboklara vəsiqə qazanmaq onlara bəs edir. Lakin bəzi aşağı liqa iştirakçıları medallarla bağlı fərqli düşüncədədi. Onlar PFL-in qərarına qarşı çıxdılar. Görəsən, qurum narazılığı necə qarşılayır? Klub rəsmilərinin fikirlərini necə dəyərləndirmək olar?
Suallarımızı PFL-in texniki-idman direktoru Elgiz Abbasova ünvanladıq:
“Qərarımızla razılaşmayan klub rəsmilərinin fikirləri ilə tanışam. Hər birinə hörmətlə yanaşıram. Lakin futbol tez-tez yenilənməli olan idman növüdü. Mükafatlandırma mərasimi indiyə qədər keçirilibsə, bu o demək deyil ki, həmişə belə olmalıdı. Təşkilatçı qurum kimi qərarı açıqlamamış müəyyən məsələləri müzakirə etdik. Yekun qərarımız belə oldu. Yenə deyirəm, burda beynəlxalq təcrübə əsas götürülüb. Futbolda aparıcı ölkələrin siyasətinə baxanda görürük ki, sadəcə, çempionlar medal və kubokla təltif olunur. Bilirsiz ki, ikinci liqada 1, 2 və 3-cü yerləri tutan komandalara medallar veriləcək. Bu, turnirin yeni olması və iştirakçıların daha motivasiyalı çıxış etməsini istəməyimiz ilə bağlıdı. Çünki 2-ci liqa yarıpeşəkardı. Həmin klubların inkişafı üçün yüksək səviyyədə dəstək vacibdi. Bununla yanaşı, ölkə kubokunun finalçıları qızıl və gümüş medalla təmin olunacaq. Hesab edirəm ki, mükafatlandırılmayan komandaların məhz bu mövzuya görə həvəssiz çıxış etməsi doğru olmaz. Hər halda, klubların bütün uğurları PFL-in tarixinə düşəcək. Lazım olduğu halda onlara sertifikat və arayışların təqdim edilməsi də mümkündü”.
Mövzu ilə bağlı AFFA-nın vitse-prezidenti, İcraiyyə Komitəsinin üzvü Vaqif Sadıqovun da fikirlərini öyrəndik:
“PFL Azərbaycan futbolunun başqa ölkələrdə olduğu kimi idarə edilməsini istəyib. Deməli, digər yerlərdə belə işlərin bəhrəsi olur. Hər halda, sözügedən qərar uzun müzakirələrdən sonra verilib. Buna baxmayaraq, başqa cür də etmək olardı. Məsələn, elə ölkələr var ki, orda mükafatların sayı ildən-ilə artır. Yeni medallar təsis edilir, müxtəlif mərasimlər keçirilir, futbolçuların həvəsləndirilməsi yönündə addımlar atılır. Ölkəmizdə də belə layihələr araya-ərsəyə gəlsəydi, pis olmazdı. Təbii ki, bu qərar da nə vaxtsa verilməli idi. Ümid edirəm ki, sözügedən yenilik futbolumuza yeni ruh gətirəcək”.
KƏNAN BAHADIR
Digər xəbərlər
