"Qarabağ" Çempionlar Liqasının 1-ci təsnifat mərhələsinin cavab oyununda "Linkoln Red İmps"i qəbul edib - 4:0.


"Football-plus.az" xəbər verir ki, matçdan sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Kevin Medianın ehtiyatda qalması onun gedişi ilə əlaqədardı?
- Getməsi ilə bağlı əminliklə məlumat yoxdu. Amma müəyyən səbəblər var idi. Ona görə əsas heyətdə oynatmadıq. Lakin ciddi maraqlanırlar. Fikir var, amma bu gün, sabah bizimlədi hələ ki. Düşünürəm ki, hər şey qaydasında olacaq.

- "Linkoln" o səviyyədə komanda deyildi. "Rakuv"la oyunöncəsi komandanı tam sınaya bildiz?
- Həmişə hər bir rəqibə ciddi yanaşırıq, hər rəqibin bizə yaşatdığı çətinliklər var. Hər zəif düşündüyümüz komanda bir cür müdafiə olunur. İstənilən rəqibə qarşı çox güc sərf edirik. "Linkoln"u məğlub etmək heç də asan olmadı, nə səfərdə, nə burda. "Rakuv"a qarşı oyunumuzda mütləq dəyişiklik olmalıdı. Çünki onlar başqa sistemdə oynayırlar, daha bərk komandadı. Bunları nəzərə alırıq. Amma öz proqramımızdan əl çəkmirik. "Rakuv" çox ciddi rəqibdi. Polşa futbolundan bir az sanki fərqli oynayırlar. Sistemləri, fəlsəfələri fərqlidi. Neçə illərdi ki, aşağı liqadan hazırlanmış, klub olaraq böyüyüb az zamanda Polşa çempionu olmaq çox böyük uğurdu. Biz bu komanda ilə Türkiyədə də qarşılaşmışıq və məğlub olmuşduq. Qarşıda bizim 5-6 günümüz olacaq ki, onları yaxından tanıyaq. İnanıram ki, futbolçularım komandanı tam dərk edəcəklər və bu oyuna başda mən olmaqla hamımız yaxşı hazırlıq keçəcəyik.

- Bəhlul Mustafazadə ilk yarıda hücuma meyillənirdi. Bu, sizin tapşırığınız idi, yoxsa rəqibdən asılı olaraq hücuma atılırdı?
- Bəhlul standart vəziyyətlərdən sonra cərimə meydançasında görünürdü. Hücumların başlamasına gəlincə, o tərəfdə boş zona olurdu deyə, irəli gedirdi. Ən üstün keyfiyyətlərindən biri odu ki, standart vəziyyətlərdə düzgün mövqe seçə bilər. Ona hansı mövqedə olması tapşırılır. Desəm ki, hücuma get demişdim, yox. Amma hücumlara daha tez başlamaq tapşırılığı verilmişdi.

- "Qarabağ"la çatmaq istədiyiniz ən böyük arzunuz nədi?
- Desəm ki, hansısa həddə çatmaq, böyük uğur əldə etmək istəyirəm, yanlış olar. Amma həmişə istəmişəm ki, mübariz komanda, yaxşı, gözəl kollektiv olsun. Dəfələrlə demişəm ki, Azərbaycan futbolunda bu komandanın adı tam fərqlənir. Məncə, əlavə açıqlamaya ehtiyac yoxdu. Bir istəyim və məsuliyyətim olub ki, nə qədər güc sərf etmək lazımdısa, edəcəm ki, "Qarabağ"ın uğurları olsun. Həm daxili, həm də xarici oyunlarda. Hər il yeni uğur əldə etmək, bir pillə irəli getmək arzumuzdu, daim çalışrııq. Buna nə dərəcədə nail oluruq, oyunlardan görürsüz.

- Azarkeş təzyiqinin neqativ və pozitiv tərəfləri hansılardı?
- Çox istəyərdim ki, həmişə pozitiv reaksiyalar olsun. İnanın ki, futbolçular normal insandılar, həddən artıq böyük məsuliyyətin altına girirlər. Çünki milyonlarla azərbaycanlı onlardan böyük uğurlar gözləyir. Azarkeşlər əmin olsunlar ki, bu futbolçular Azərbaycan idmanı, futbolu, "Qarabağ" üçün bacardıqlarından artığını etməyə çalışırlar. İşgüzar və tələbkardılar. Çox istəyərdim ki, bütün futbolçularımıza qarşı pozitiv olsunlar. Amma azarkeşlərimə, azərbaycanlılarıma qarşı düşüncəm həmişə pozitivdi, neqativ deyil. Futbolçularımı da buna çağırıram həmişə. Hər azarkeşin şəxsi fikri, istəyi, düşüncəsi olur. Belə hallar futbolu gözəlləşdirir. Hətta bəzi komandalara, futbolçulara xarakter verir. Onların futbolçulara qarşı düşündüyü neqativ fikirlər, bizə daha da pozitiv reaksiya verir.

- "Qarabağ"da sırf mərkəz hücumçusu mövqeyinə axtarışlar gedir?
- Sırf mərkəz hücumçusu axtarsaq, dünya futbolunda az rast gələrik. İndi futbol tam fərqlidi. Hansısa komandaya sırf mərkəz hücumçusu lazımdı, hansınasa lazım deyil. Bu gün Cicadan da həmin mövqedə istifadə edirik. Juninyonu almışıq. Keytanı da o mövqedə istifadə edə bilərik. Hansısa sıxıntı olduğunu düşünmürük. Hamısı bizə uyğun futbolçulardı. Ön xətdəki oyunçulardan razıyam.

- "Qarabağ" bundan sonra transfer edəcək?
- Transfer bazarı işimizin ən vacib hissəsindən biridi. Heyətimizdə 20-25 futbolçu olsa da, yeni oyunçularla maraqlanırıq. Hər bir məşqçi istəyər ki, heyətində düşündüyü oyun tərzinə uyğun oyunçuları olsun. Buna görə daim axtarışdayıq. Bəzən aylar, illərlə gözləyirik. Biz daim transfer bazarında aktivik, daim komandaya yeni oyunçular cəlb etmək istəyirik. İndi də işlərimiz davam edir. Bir neçə futbolçu ilə danışıq gedir. Müdafiə, yarımmüdafiə, hücum xətti ola bilər. Elə futbolçular var ki, nə qədər vaxtdı onları izləyirik. Sadəcə bəzən düşünmədiyin halda transfer alınmır. 20-25 gün əvvəl bu başımıza gəldi. Futbolçunun biletini almışdıq, səhər Bakıda olmalıydı, klublar arasında razılıq olmuşdu. Ancaq sonda bu transfer alınmadı. Bizdən asılı olmayan məqamlar var ki, yoluna qoya bilmirik. Transfer axtarışındayıq. Alına da bilər, alınmaya da.

- Daxili liqada da güclü mübarizə olacağı gözlənilir, "Neftçi"də yeni nəfəs var, "Sabah"da heyətini gücləndirib...
- İddialı komandalar çoxalıb. Məncə, daha maraqlı çempionat olacaq.