“Araz Naxçıvan” premyer-liqada iştirak üçün hazırlığa İdarə Heyətində aparılan islahatlarla başladı.

Klubla bağlı növbəti yenilik isə dünən ictimaiyyətə açıqlandı. Nəhayət, futbolçuların tibbi yoxlamadan keçdiyini gördük. Bu, Naxçıvan təmsilçisinin heyətin formalaşdırılması yönündə yaydığı ilk rəsmi məlumat idi.

Reallıq odu ki, Naxçıvan təmsilçisi yay hazırlıq dönəmində çox yavaş irəliləyir. Nəticədə cavabsız suallar bir-birinin ardınca gəlir. Əsas məsələləri əhatə edən detalları aydınlaşdırmaq məqsədilə dünən klubun yeni icraçı direktoru Eldəniz Yusubovla danışdıq.

- Yeni rəhbərliyin gəlişi son həftələrdə ümidsizləşən naxçıvanlı azarkeşləri sevindirib. Amma reallıq odu ki, bir çox problemin həlli yarımçıq qalıb. Qalanı da, ümumiyyətlə, həll olunmayıb. Bundan sonra İdarə Heyətinin yükü ağır olacaq. Məsələyə daha geniş baxsaq, futbol ictimaiyyətini necə bir “Araz Naxçıvan” gözləyir? Bütün çatışmazlıqlardan yaxa qurtarmaq üçün hansı addımlar atılacaq?
- Bura böyük həvəs və planlarla gəlmişik. 10 gündü iş başındayıq. İlkin mərhələdə vacib çatışmazlıqları aradan qaldıracağıq. İnanın ki, gecə-gündüz çalışırıq. Əvvəlki hədəflər dəyişdiyindən hazırlıq prosesini sürətləndirmişik. Qısa vaxt ərzində klubu peşəkarlığın bütün meyarlarına cavab verəcək vəziyyətə gətirəcəyik. Premyer-liqada ilk “dördlük” uğrunda mübarizə aparacağımızı demişdim. Niyyətimiz naxçıvanlı azarkeşləri daim sevindirməkdi. Bütün layihələr buna uyğun reallaşdırılacaq.

- Əvvəlki İdarə Heyətinin dönəmində klub maliyyə problemləri ilə üz-üzə qalmışdı. Nə heyət, nə stadion, nə də sponsor məsələləri ilə bağlı addım atıldı. Bu məsələlərin həlli üçün nə edilib və ya ediləcək?
- İlk iş kimi heyətin formalaşdırılması prosesinə başlanılıb. Bu gün baş məşqçimiz Azər Bağırovun seçdiyi futbolçular tibbi yoxlamadan keçdi. Cavabları gözləyirik. Uyğun olan futbolçularla müqavilə bağlayacağıq. Onların hamısı yerlidi. Başqa transferlər də nəzərdə tutulub. Bu məsələni çalışdırıcımızla müntəzəm müzakirə edirik. Şükür Allaha, maliyyəmiz bəllidi. Yeni rəhbərliyin gəlişi ilə maddi sıxıntılar aradan qaldırıldı. Azər bəy hansı büdcəyə və mövqeyə uyğun futbolçu axtaracağını bilir. Yaxşı mütəxəssisdi. Qısa zamanda yeniliklər olacaq. Dediyim kimi, heyəti hədəfimizə uyğun formalaşdıracağıq. Stadiona gəlincə, komanda sentyabrın sonuna qədər Bakıda – “Dalğa Arena”da məskunlaşacaq. Buna paralel olaraq Naxçıvan şəhər stadionunda bərpa işləri yekunlaşdırılacaq. Stadionu AFFA və UEFA tələblərinə uyğun hazırlayacağıq. Ümid edirik ki, sentyabrdan sonra ev oyunlarını “doğma divarlar” arasında keçirəcəyik.

- “Kəpəz”dən başqa bütün premyer-liqa klubları təlim-məşq toplanışı üçün xaricə yollanır. Bildiyimiz qədər “Araz Naxçıvan” da Türkiyəyə səfər etmək niyyətindədi. Hətta Azər Bağırov mətbuata açıqlamasında Ərzurumdakı yerlərinin hazır olduğunu deyib. Proses bu qədər irəliləyibsə, məsələ niyə yubanır?
- Çünki hələ heyətlə bağlı problemlər həll olunmayıb. Komanda komplektləşdikdən sonra qardaş ölkəyə səfər etmək istəyirik. Bununla bağlı baş məşqçimizə də məlumat verilib. O, həm də rəqiblərin seçimi və təhlili ilə məşğuldu. Premyer-liqa oyunlarımıza maksimum töhfə verə biləcək komandalarla oynamaq istəyirik.

- Futzal Federasiyasının mətbuat xidmətinin rəhbəri Mahal Məmmədovun “Araz Naxçıvan”ın sözçüsü olacağı deyilir. Doğru xəbərdi?
- Xeyr. Klubda hələ ki başqa təyinat reallaşmayıb. Mahal bəy bizimlədi. Plan üzrə hazırlıqlarımıza kömək edir. Sağ olsun, təcrübəsini bizimlə bölüşür. Çox güman, ona başqa vəzifə təklif ediləcək. İstəyirik ki, bizimlə çalışsın. Hədəflərimizi gerçəkləşdirə bilmək üçün təcrübəli kadrlara ehtiyacımız var.

KƏNAN BAHADIR