Futbol dünyasında yeni mövsümə hazırlıq dönəmi davam edərkən UEFA Maliyyə Nəzarəti Komitəsinin qərarlarını açıqlayıb.

"Football-plus.az" xəbər verir ki, bəyanatda Türkiyənin 4 təmsilçisinin durumuna da toxunulub.

Hər bir klub UEFA ilə müəyyən anlaşma əldə etdikdə və üzərinə öhdəlik götürdükdə buna riayət etmək məcburiyyətindədi. Belə klublardan biri “Beşiktaş” idi. İstanbul nəhəngi ötən mövsüm üçün müəyyənləşdirilən hədəfə çatmağı bacarıb. Amma UEFA maliyyə cəhətdən “Qartal”ı gələn mövsüm də izləməkdə davam edəcək. Digər 3 Türkiyə təmsilçisi ilə bağlı isə durum fərqlidi. “Trabzonspor” “başabaş” şərtinə əməl edə bilməyib. Buna görə də UEFA ilə yeni anlaşma əldə olunub. Buna əsasən qaradənizlilər quruma 2 milyon avro ödəməli olacaqlar. Bunun 300 min avrosu sabit və məcburi ödəmədi. Yerdə qalan 1,7 milyon avronun ödənişi isə yeni mövsümdə anlaşmadakı hədəflərə riayət edilib-edilməməsindən asılı olacaq. Riayət edilməsə, “Trabzonspor”a başqa cəzalar da verilə bilər. “İstanbul BŞ” 2022-ci il üçün müəyyənləşdirilən maliyyə hədəflərini qarşılaya bilmədiyi üçün 400 min avro para cəzası alıb. “Konyaspor” isə bu hədəflərin yalnız kiçik bir hissəsini qarşılaya bilməyib. Ona görə də bu kluba 100 min avro para cəzası verilib.

UEFA-nın bəyanatında qeyd olunur ki, “Beşiktaş”dan başqa “Milan”, “Monako”, “Roma”, “İnter”, “Marsel” və PSJ də anlaşmanın şərtlərini birəbir yerinə yetirib. Amma UEFA bu klubları da nəzarətdə saxlamaqda davam edəcək. “Lill” isə ardıcıl 2-ci mövsüm bütün şərtləri yerinə yetirdiyi üçün artıq nəzarətdən çıxarılıb.