Türkiyə AÇ-yə evsahibliyi üçün hansı stadionları seçdi?
Türkiyənin 2028 və 2032-ci illərdə keçiriləcək Avropa çempionatlarına evsahibliyi etməsi üçün namizədlik dosyesinin ölkənin gənclər və idman naziri Mehmet Muharrem Kasapoğlu tərəfindən imzalandığını xəbər vermişdik.
"Football-plus.az" xəbər verir ki, dünən həmin dosye Türkiyədən gedən nümayəndə heyəti ilə UEFA-nın Nyondakı mənzil-qərərgahına çatdırıldı.
Əslində qardaş ölkə rəsmi şəkildə namizədliyini hələ ötən il martın 23-də açıqlamışdı. Amma 8 aylıq çalışma nəticəsində ortaya çıxan dosyedə UEFA-ya bütün texniki detallar, hökumət tərəfindən verilən zəmanətlər, dəstək məktubları, çalışma kitabları və stadionların adları təqdim olunub.
Xatırladaq ki, indiyə qədər AÇ-2028 üçün Britaniya krallığının ölkələri və İrlandiya, AÇ-2032 üçün isə İtaliya namizədliyini irəli sürüb. UEFA hər iki turnirə evsahibliyi edəcək ölkələrin adlarını bu ilin oktyabrında açıqlayacaq.
Türkiyə Futbol Federasiyasının prezidenti Mehmet Büyükekşi məsələ ilə bağlı bunları deyib:
“Avropanın yığma komandalar çərçivəsindəki ən böyük turnirini Türkiyədə keçirmək üçün ardıcıl 5-ci dəfə namizədliyini irəli sürən federasiyamız nə qədər qərarlı və istəkli olduğunu növbəti dəfə bütün dünyaya göstərdi. Ən xırda detallarına qədər üzərində çalışdığımız namizədlik dosyesini UEFA-ya təqdim etməkdən məmnunluq duyuruq. Başda ölkə prezidenti olmaqla bütün nazirlərimizə və bələdiyyə sədrlərinə bizi dəstəkləmək üçün verdikləri zəmanətlərə görə təşəkkürümüzü bildiririk.
UEFA-nın namizədlərdən tələb etdiyi, amma hər ölkədə tapa bilmədiyi bu zəmanətlər bizim namizədliyimizi daha da güclü edir. Müasir stadionlarımız, bazalarımız, ölkəmizdəki futbol sevgisi və ən üst dərəcədə təşkilatçılıq bacarığı ilə həmişə öyünmüşük. Belə böyük turnirə evsahibliyi hüququnu qazanmağımız cümhuriyyətimizin 100 illik yubileyini daha da şahlandıracaq və ölkəmizə böyük dəyər qatacaq”.
Sonda Türkiyənin UEFA-ya təqdim etdiyi 9 stadionla sizi tanış edirik.
Ən azı 60 min azarkeş tutumu tələbinə cavab verən stadion: “Atatürk Olimpiya” (74753 yerlik).
Ən azı 50 min azarkeş tutumu tələbinə cavab verən stadion: “NEF Stadionu” (52223)
Ən azı 40 min azarkeş tutumu tələbinə cavab verən 4 stadion: “Ülkər” (47834), “Konya Böyükşəhər Stadionu” (42000), “Bursa Böyükşəhər Bələdiyyə Stadionu” (43361), “Trabzon Şenol Günəş İdman Kompleksi” (40782)
Ən azı 30 min azarkeş tutumu tələbinə cavab verən 3 stadion: “Antalya Arena” (32537), “Əskişəhər Atatürk Stadionu” (32500), “Qaziantep Kalyon Stadionu” (33500).
Digər xəbərlər
