İki gün öncə Avroliqanın qrup oyunları start götürdü.

Yeganə təmsilçimiz "Qarabağ" "Frayburq"un qonağı oldu. Bu matçda ədaləti Erix Lambrextsin rəhbərlik etdiyi hakimlər briqadası qoruyurdu. Lakin belçikalı referi heç də ədalətli olmadı...

5-ci dəqiqədə Toral Bayramovun rəqib futbolçuyla toqquşmasını qayda pozuntusu kimi qiymətləndirərək qapımıza penalti təyin etdi. Rəqib futbolçu Ritsu Doana 60-cı dəqiqədə elə həmin Torala qarşı qayda pozuntusuna görə 2-ci sarı vərəqəni göstərmədi. 81-ci dəqiqədə Abdulla Zubirə qarşı aşkar kobudluğa görə penalti təyin etməməsi isə baş hakimin ən “yaddaqalan” qərarıdı.

Daimi ekspertlərimizdən Tahir Süleymanov da belçikalının səhvlərə yol verdiyini vurğuladı:

“Bu qarşılaşma çox müzakirə olunacaq. İstər komandaların sərgilədiyi oyun planında, istərsə də hakim idarəçiliyi baxımından. İlk 15 dəqiqədə güclü rəqibin və tribunaların təzyiqi "Qarabağ"da həyəcan yaratmışdı. 5-ci dəqiqədə meydanda olan 22 futbolçunun və azarkeşlərin gözləmədiyi penalti qərarı görüşün axarına təsir etdi. "Fraybuq"lu futbolçu zədələnməsəydi, epizodun üstündən keçilə bilərdi. Cərimə meydançasında buna oxşar mübarizə anları çox yaşanır. Həkimlərin meydana çıxması, matçda yaranan təbii fasilə VAR otağı üçün göydəndüşmə oldu. İlk anda obyektivlik nümunəsi kimi görünən qərar qarşılaşmanın sonlarında yaşananlarla üst-üstə düşmədi. "Qarabağ" şokdan ayılıb qol vurandan sonra matçda vəziyyət dəyişdi. Referi üçün oyunu idarə etmək çətin olmamalıydı. Çünki komandalar, futbolçular bir-birinə hörmətlə yanaşır, ikili mübarizələrdə həddi aşmırdılar. Ayağa açıq zərbələr, mübahisələr, demək olar ki, yaşanmırdı. Ən pis halda rəqiblər bir-birini əllə tutub saxlayırdı. İkinci hissədə oyunda gərginliyi, mübahisələri, etirazları yaradan hakimlər briqadası oldu. Ağdamlılar məğlubiyyətlə barışmadığını göstərdikcə, hakimlərin niyyəti üzə çıxmağa başladı. Xırda follar, aut epizodunda yerli komandaya dəstək artıq kifayət etmirdi. "Frayburq"lu müdafiəçinin cərimə meydançasının kənarında, "Qarabağ"ın təhlükəli hücumu zamanı topu bilərəkdən əllə saxlamasını bağışladı. Müasir futbolda sarı vərəqə adi hal kimi görünə bilər. Müdafiəçinin rəsmi xəbərdarlıq alması növbəti dəqiqələrdə ehtiyatlı davranmasını şərtləndirir, ikili mübarizələrdə rəqib üstünlük qazanır. Doanın futbolçumuzu açıq-aşkar əllə tutub saxlaması da ikinci sarı və qırmızı vərəqə ola bilərdi. Belçikalı referi qeyd olunanları "görmürdü". Bütün bunlara baxmayaraq, "Qarabağ" oyundan qopmur, rəqibdən, dolu tribunalardan çəkinmir, məğlubiyyətlə razılaşmayaraq hücumları davam etdirirdi. Matçın kuliminasiya nöqtəsi Zubirin penalti epizodu oldu. Bu məqam çox müzakirə olunur, fərqli fikirlər səsləndirilir. Epizodun detallı izahına ehtiyac var. Futbolda top uğrunda mübarizədə bərabər halda çiyin-çiyinə, bir daha xüsusi vurğulayıram, topa yönələn bərabər çiyin mübarizəsinə icazə verilir. Bunu ayırd etmək baş hakimin vəzifə, idarəçilik borcudu. Ötürmədən sonra Zubir 100 faiz topa nəzarət edirdi. Rəqib futbolçular epizodun başlanğıcından etibarən onunla top uğrunda mübarizədə iştirak etmirdilər, mövqe səhvinə yol vermişdilər. Cərimə meydançasında işlək sağ ayağı ilə zərbə vurmağa hazırlaşarkən, rəqib futbolçu özünü top uğrunda mübarizəyə yox, son anda Zubirə çatdırdı. Futbolçumuz zərbə anında topu mükəmməl qoruyurdu və rəqibin sol tərəfdən topa çatması, qaydalar çərçivəsində mübarizəyə qoşulması mümkünsüz idi. Ancaq öndən və ya sağ tərəfdən top Zubirdən alına, zərbənin qarşısı kəsilə, mane oluna bilərdi. "Frayburq"lu futbolçu bunu gözəl anlayırdı və düşüncəsi nəyin bahasına olur-olsun, zərbəyə mane olmaq idi. Rəqib üçün topa müdaxilə, ən azı Zubirlə bərabər istiqamət alaraq çiyin-çiyinə hərəkəti mümkünsüz idi. Futbolçu sağ qolu ilə onu tam arxa yox, arxa-sol tərəfindən açıq-aşkar itələdi. Zubirin sol qolu və çiyni öndə idi, "çirkli" də olsa, hansısa çiyin-çiyinə mübarizə baş verməmişdi. Rəqibin hərəkəti, niyyəti Zubiri istənilən yolla qapıya zərbə vurmaqdan məhrum etmək idi. Bu penalti epizoduna görə VAR-a ehtiyac da yoxdu. Çox sadə və açıq epizoddu. Referi dərhal qayda pozuntusu qeydə almalıydı.
Niyə penalti verilmədi? Hakim səhvi yox, ümumi briqadanın oyuna, rəqiblərə öncədən birgə yanaşması, düşüncəsi idi. Matçın ilk dəqiqələrində qarışıqlıq zamanı VAR otağı mikroskopla heç kimin gözləmədiyi penaltini axtarıb tapırsa, Zubirin epizodunda belçikalıya məsləhət belə görülmür ki, "epizoda bir daha özün bax". Referi-VAR otağı "sinxronluğu” gözdən pərdə asmaq, baş hakimə qərarında dəstək niyyəti güdürdü. Fasilədən sonra hakimlərin görünən qədər "Frayburq"a simpatiyası böyük Almaniya futbolunun Azərbaycan qarşısında xal itirməsinə yol verməzdi. Avropanın rəsmi mərkəzi Brüsselin nümayəndəsi ilə VAR otağı Minsk qrupuna çevrilmişdi, digər həmsədrlər çatışmırdı. Nə qədər deyilsə ki, idman siyasətdən uzaqdı, hər dəfə əksi baş verir. Azərbaycanın "Qarabağ"ı səfərdə, bundesliqanın lideri qarşısında, “haqsızlıqlara baxmayaraq, ərazi üstünlüyünə sahib olaraq öz ərazimizi özümüz müəyyənləşdiririk” mesajını bir daha bütün Avropaya çatdırdı".

ABDULLA İSMAYILOĞLU