Gürcüstan və Rumıniyanın ev sahibliyi ilə keçən 21 yaşa qədər futbolçular arasında Avropa Çempionatına dünən yekun vuruldu.

"Football-plus.az" xəbər verir ki, Batumidə keçirilən həlledici görüşdə İngiltərə ilə İspaniya qarşılaşdı. Görüşdə yeganə qol fasilə ərəfəsində vuruldu.

''Mançester Siti''li Koul Palmerin cərimə zərbəsindən vurduğu top ''Liverpul''lu Kertis Consa dəyərək tora daxil oldu. Qol Consun adına yazıldı. Matçın son anları olduqca dramatik alındı. Əsas vaxta əlavə olunmuş 9-cu dəqiqədə İspaniya penalti qazandı. İspanların kapitanı və lideri, daha öncə U-17 və U-19-un heyətində AÇ-nin, ''Barselona''nın heyətində gənclər arasında ÇL-in qalibi olan Abel Ruis özü qazandığı penaltidə topun başına keçdi. Amma ingilislərin qapıçısı Ceyms Trafford istiqaməti düzgün taparaq qola imkan vermədi. Turnirin ən yaxşı oyunçusu Kreyq Qordon seçilsə də, məhz qapıçı Trafford İngiltərənin əsas qəhrəmanına çevrildi.

Beləliklə, ''gənc şirlər'' 39 ildən sonra ilk dəfə, tarixdə 3-cü dəfə qitə turnirinin qalibi oldular. İngilislər bu sevinci 1982 və 1984-cü ildə də yaşamışdılar. Ən əsası komanda bu turnirdə keçirdiyi 6 oyunun hamısında qapısını toxunulmaz saxladı. Daha öncə bu turnirin tarixində qol buraxmadan çempion olan komanda olmamışdı! Xatırladaq ki, ötən il İngiltərə 19 yaşa qədər oyunçular arasında da AÇ-nin qalibi olmuşdu.

ƏLİ