Gürcüstan və Rumıniyanın ev sahibliyində 21 yaşa qədər futbolçular arasında Avropa Çempionatı davam edir.

"Football-plus.az" xəbər verir ki, dünən A və B qrupunda mübarizəyə yekun vurulub. İlk 1/4 finalçılar bəlli olub.

Gürcüstanın bu turnirdə hər ev oyunu yerli əhali üçün bayrama çevrilir. Futbolçular da ümidləri doğrultmağı bacarır. Dünən gürcülər Niderland ilə qarşılaşdılar. ''Boris Payçadze'' stadionundakı hər oyun tarixi alınır. 2-ci turda Belçikaya qarşı oyunda stadiona 41886 azarkeş gəlmiş və turnirin rekordu qırılmışdı. Amma Niderlandla oyunu 43004 azarkeş izlədi və artıq bu qarşılaşma 21 yaşa qədər oyunçular arasında AÇ-lərin tarixinə ən çox izlənilən oyun kimi düşdü.

Matç Gürcüstana sərf edən 1:1 hesabı ilə başa çatdı. Belçika, Portuqaliya və Niderlandın yer aldığı çətin qrupu 5 xalla zirvədə tamamlayan Gürcüstan tarixində ilk dəfə bu yaş kateqoriyasında keçirilən AÇ-də pley-offa yüksəldi. Son turnirin yarımfinalçısı Niderland qrupda qaldı. 2-ci pillə Belçikanı son dəqiqələrdəki penalti qolu ilə 2:1 məğlub edən Portuqaliyaya qismət oldu.

Gürcüstanın pley-offdakı rəqibi bu gün C qrupuna yekun vurulduqdan sonra bəlli olacaq. B qrupunda isə pley-offa yüksələnlər 3-cü turdan öncə bəlli idi. Sadəcə 2 oyuna 6 xal toplayan Ukrayna ilə İspaniya öz aralarında qrup liderini muəyyənləşdirməli idilər. Son saniyələrdə məğlubiyyətdən qurtulan (2:2) İspaniya qrupu lider kimi tamamladı.