İsrail polisi və yerli futbol qurumu yığmanın AÇ-2024-ün seçmə mərhələsi çərçivəsində Andorra ilə dünən axşam keçirdiyi oyun üçün bilet satışını məhdudlaşdırıb.

"Football-plus.az" xəbər verir ki, belə qərarın verilməsinə “Beytar” fanatlarının meydana axışmaq və oyunu dayandırmaq ilə bağlı təhdidləri səbəb olub. Yerusəlim komandasının azarkeşləri İsrail Futbol Federasiyasının klubun ölkə kubokunun 2023/24 mövsümündə iştirakına qadağa qoymasından narazıdı.
Ötən saylarımızdan birində də xəbər verdiyimiz kimi, İsrail Futbol Federasiyası fanatları 2023/23 mövsümündə finaldan sonra keçirilən mükafatlandırma mərasimini pozduğuna görə “Beytar”ı ölkə kubokunun növbəti mövsümünün iştirakçıları sırasından uzaqlaşdırıb. “La-Familiya” qruplaşmasında birləşən ən ekstremist ruhlu fanatlar isə bu işi hətta İsrail yığmasının AÇ-2024-ün seçmə turnirindən uzaqlaşdırılmasına qədər davam etdirmək niyyətində olduğunu gizlətmir.

İsrail – Andorra oyunu dünən axşam Yerusəlimdəki “Teddi” stadionunda keçirilib. Stadionun tribunalarındakı ilk 10 sıranı bloklayan İsrail polisi elan edib ki, stadionda və onun ətragında 800 asayiş keşikçisi olacaq, bura nümayişlərin dağıdılması üzrə ixtisaslaşan xüsusi təyinatlı bölmə də daxildi. Yığmaların məskən saldığı otellər də ciddi mühafizə olunub. “Teddi” stadionu 32 min yerlik olsa da, haqqında danışdığımız oyun üçün 15 min bilet satışa çıxarılıb.