Həmkarlar İttifaqı isə onun müdafiəsinə qalxdı
MBA “Memfis”in oyun qurucusu Ca Morantın 25 oyunluq diskvalifikasiya olunduğunu elan edib.
"Football-plus.az" xəbər verir ki, bu cəza 2023/24 mövsümünün startından qüvvəyə minəcək. Basketbolçu liqanın imicinə vurduğu zərbəyə görə cəza müddətində maaş da almayacaq. Bundan başqa, o, parket üzərinə dönənə qədər müəyyən şərtləri yerinə yetirməli, MBA-nın və ya klubunun heç bir tədbirində iştirak etməməli, mövsümöncəsi yoxlama oyunlarına belə qatılmamalıdı.
Xatırladaq ki, Morantın odlu silah göstərməsi ilə bağlı ilk qalmaqal martda baş vermiş və onda 8 oyunluq cəzaya məruz qalmışdı. Mayın 14-də isə sosial şəbəkədə canlı yayın zamanı növbəti dəfə publikaya odlu silah göstərdi. Belədə “Memfis” son mövsümdə 66 oyunda iştirak edən, orta hesabla 26 xal, 5,9 ribaund və 8 məhsuldar ötürmə ilə yadda qalan ulduzunu qeyri-müəyyən müddətə heyətdən kənarlaşdırdı.
Morant artıq yeni cəza ilə bağlı açıqlama verib:
“Düşünmək üçün vaxtım olub. Nələrə səbəb olduğumu anlayıram. MBA-dan, “Qrizzlis”dən, komanda yoldaşlarımdan və Memfis şəhərindən üzr istəyirəm. Adam Silverdən, Zak Kleymandan və Robert Peradan – mənə peşəkar idmançı olmaq imkanı yaradan, dəstək verən bu adamlardan da üzr istəyirəm. Mənim kimi olmaq istəyən uşaqlar üçün nümunə ola bilmədiyimə görə günahım böyükdü. Yaxşı nümunə olacağıma söz verirəm. Bütün sponsorlarıma da bu yöndə söz verirəm. Psixi sağlamlıq durumum üzərində işləməklə mövsümlərarası dövrü arxada qoyacam. Həmçinin məşq edəcəyəm ki, meydana qayıda biləcəyim məqam üçün hazır olum. Komanda yoldaşlarımın mənsiz də işinin öhdəsindən gələcəyini bilirəm, çox təəssüf edirəm ki, mövsümün əvvəlini mənsiz keçirəcəksiz. Ümid edirəm ki, zamanla mənə özümü göstərmək üçün şans verəcəksiz”.
Etiraf çıxışı öz yerində, ancaq Morantın sosial şəbəkədə tapança göstərdiyinə görə ciddi maliyyə itkisinə məruz qalacağı da aydındı. ESPN onun artıq 50 milyon dollara yaxın itirdiyini hesablayıb. Axı arzuolunmaz davranışına görə bir çox sponsor onunla əməkdaşlıqdan imtina edib. Bu arada MBA oyunçularının Həmkarlar İttifaqı da 25 oyunluq cəza ilə bağlı rəsmi bəyanat yayıb:
“Ca günahını boynuna alıb və hərəkətlərinə görə məsuliyyətini etiraf edib. Biz onu sözsüz şəkildə dəstəkləyirik. Ona görə ki, özünü, oyunçularımızı və liqanı ən yaxşı şəkildə təmsil etmək üçün əlindən gələni əsirgəmir. Onu dekabra qədər meydandan uzaq salan və qayıdana qədər bəzi şərtlərə əməl etməsini tələb edən intizam cəzasına gəlincə, biz bu cəzanı müəyyən səbəblərdən hədsiz sərt və yersiz sayırıq. Ca ilə bütün variantları və sonrakı addımları müzakirə edəcəyik”.
Digər xəbərlər
