AFFA İcraiyyə Komitəsinin iyunun 16-da Mərdəkanda keçirilən iclasından sonra qurumun üzvü, Regional Futbol Federasiyasının prezidenti İsgəndər Cavadovla danışdıq.

"Football-plus.az" olaraq onunla bir çox mövzu ətrafında maraqlı söhbətimiz alındı.

- Bu gün İcraiyyə Komitəsi növbəti iclasını keçirdi, müvafiq qərarlar qəbul etdi...
- Bəli, növbəti iclasımızı keçirdik. Fərqli fikirlər, təkliflər səsləndirildi. Sonda premyer-liqada və 1-ci divizionda 10 komandalı çempionatın, əvəzedicilərin yarışının ayrı keçirilməsi və 2-ci divizionun yaradılmasıyla bağlı qərarlar verdik. Düşünürəm ki, bu yeniliklər ölkə futbolunun inkişafında rol oynayacaq. Əsas məqsədimiz bölgələrdə futbolun populyarlaşması, dirçəlməsidi.

- Bölgədə futbolun inkişafını qeyd etdiz, amma hazırda "Kəpəz"də vəziyyət heç də ürəkaçan deyil. Komandanı elitada saxlayan Tərlan Əhmədov yola salındı. Bundan sonra Gəncə təmsilçisindən nə gözləyək?
- Biz əlimizdən gələni etməyə çalışırıq ki, "Kəpəz" daha da inkişaf etsin. Sponsorlar axtarırıq ki, komandaya sahib çıxsın, amma hələ ki nəticə hasil olmayıb. Hətta Rusiyada belə imkanlı tanışlarımıza, iş adamlarına müraciət etmişik. Amma yaxın duran yoxdu. Klubda kimin qalıb-qalmaması haqda nəsə deyə bilmərəm. Bu komandanın daxili işidi.

- Sizcə, ağır və çıxılmaz vəziyyətdə olan "Kəpəz"i elitadan düşməyə qoymayan Tərlan Əhmədov yola salınmalıydı?
- Tərlan Əhmədovun məşqçiliyinə kiminsə şübhəsi yoxdu. Millimizin sabiq üzvü, əlbəttə, yaxşı mütəxəssisdi. Şəxsən mən onun “Kəpəz”də qalmasının tərəfdarıydım. Dəqiq bilmirəm, nə üçün onu yola saldılar. İstənilən halda, yuxarıda qeyd etdiyim kimi, bu klubun daxili işidi, mənim və ya başqasının səlahiyyətinə aid məsələ deyil ki, qarışaq.

- Maliyyə dayağı güclənməsə, “Kəpəz”in sonu necə olacaq?
- Biz yenə də ümidimizi itirmirik. Sponsor axtarışını davam etdirəcəyik. Amma komanda ancaq AFFA-nın ayırdığı büdcə ilə davam etsə, işi çox çətin olacaq. Yəni "Kəpəz"dən uğurlu çıxış gözləmək çətin olacaq.

- Gəncədə stadion məsələsiylə bağlı nə yenilik var?
- Gəncə şəhər stadionu söküləcək. Onun yerində 4-5 minlik yardımcı meydan olacaq. Əsas stadion isə bir qədər kənarda yenidən tikiləcək. Təxminən 15 min tutuma malik arena olacaq.

- Sizcə, De Byazini yola salıb yerli məşqçilərə şans verməyin vaxtı çatmayıb?
- Mənim fikirimə qalsa, yerli mütəxəssislər millidə olmalıdı. Onsuz da yaxın illərdə nə Avropa, nə də dünya çempionu olacağıq. Bu turnirlərin final mərhələsinə vəsiqə qazanmaq belə çətin görünür. Hazırkı nəticələrimizə nəzər yetirsək, bunu yerli məşqçilər də bacarar. Bu vaxta kimi yığmada 5 əcnəbi məşqçi çalışıb ki, onlardan heç biri uğur qazanmayıb. Onlara bu qədər pullar tökülürsə və nəticə yoxdusa, deməli, öz məşqçilərimizə güvənməliyik. İstənilən halda, yerli mütəxəssislər mentallığı, yerli şəraiti yaxşı bilir, futbolçularla dil tapmaqda problem yaşamır.

ABDULLA İSMAYILOĞLU