Çoxları qarşılaşmanın Canni de Byazinin komandası üçün rahat keçəcəyini düşünsə də, belə olmadı. Əksinə, qonaqlar yığmamıza çətin anlar yaşatdı.

"Football-plus.az" 1:1 hesabı ilə başa çatan görüşdən əvvəl və sonra yaşanan maraqlı məqamları diqqətinizə çatdırır.

* Oyunun “Dalğa Arena”da keçirildiyini nəzərə alan AFFA azarkeşlərin stadiona getməsi üçün avtobuslar ayırmışdı. “Koroğlu” metrostansiyasının yaxınlığında dayanan nəqliyyat vasitələrinin çoxu, demək olar ki, istifadəsiz qaldı.

* Görüşü izləyənlər arasında AFFA İcraiyyə Komitəsinin bir çox üzvü, PFL prezidenti Elxan Səmədov, gənclər və idman naziri Fərid Qayıbov, Qurban Qurbanov və Rəşad Sadıqov da var idi.

* Qarşılaşmanı izləmək üçün Estoniyadan 50-yə yaxın azarkeş və 10-a yaxın jurnalist də gəlmişdi.

* Görüşü qapı arxasından izləyən azarkeşlər olduqca fəal idi. Onlar həm məşq zamanı, həm də qarşılaşma başlamamış bir-bir futbolçuların adını çəkərək alqışlayırdı.

* İlk hissədə Mahir Emreli Höccət Haqverdi ilə mövqe problemi yaşayırdı. 45 dəqiqə ərzində “Dinamo”nun üzvü üç dəfə De Byaziyə “Neftçi”nin müdafiəçiəsindən şikayətləndi.

* İlk hissəyə əlavə olunan dəqiqədə Mahir Emrelinin zərbəsi qapıdan aralı keçdi. Futbolçu bundan sonra azarkeşləri fəal olmağa çağırdı. Maraqlıdı ki, bu hadisədən 1 dəqiqə sonra baş hakim ilk hissəni bitirdi.

* 70-ci dəqiqədə Canni de Byazi nəyəsə əsəbləşib tərcüməçisini məşq edən futbolçularının yanına göndərdi. O, Musa Qurbanlı ilə təxminən 2-3 dəqiqə söhbətləşdi. Bundan sonra De Byazi onlara qoşuldu, amma Musa meydana 80-ci dəqiqədə daxil oldu.

* Matçın bitməsinə 2 dəqiqə qalmış Ramil Şeydayevin yorğunluğu hiss olunurdu. Həmin anda millimizin üzvü topa düzgün müdaxilə edə bilmədi. Bu isə De Byazini özündən çıxardı. O, yerə əyilərək Ramilə “oyun bitməyib, davam et” dedi. Futbolçunun çox yorulduğunu görən italiyalı mütəxəssis Toral Bayramovu irəli atılmağa səslədi.

* Görüş bitəndən sonra estoniyalı azarkeşlər öz ölkələrinin adını səsləndirərək arenanı tərk etmək istəyirdi. Polislər hansısa problemin yaşanmaması üçün onları stadiondan çıxmağa tələsdirirdi.

* Millinin futbolçuları olduqca üzgün idi. Yalnız Bəhlul Mustafazadə “mix-zona”ya yaxınlaşaraq jurnalsitlərin suallarını cavabladı. Renat Dadaşovun da fikirlərini öyrənmək istəsək də, “avtobus stadionu tez tərk edəcək, başqa vaxt danışarıq” deyərək yoluna davam etdi.

* Qalib gələ bilməsək də, azarkeşlər futbolçuların performansından razı idi. Görüşdən sonra azyaşlılar Şahruddin Məhəmmədəliyev, Aleksey İsayev və Ramil Şeydayevin başına toplaşaraq şəkil çəkdirir, avtoqraf alırdı.

* Mətbuat konfransında media nümayəndələri ilə Canni de Byazi arasında maraqlı dialoqlar yaşandı. Millinin uğursuz çıxışı ilə bağlı bəhanələrin axasına sığınan italiyalı mütəxəssisin son sözü “qovmasalar, getməyəcəm” oldu.

* Qarşılaşma bitən kimi gənclər və idman naziri Fərid Qayıbov avtomobilinə minərək stadionu tərk etdi.

* AFFA İcraiyyə Komitəsinin üzvləri və PFL prezidenti qarşılaşmadan 51 dəqiqə sonra arenanı tərk etdi. Elmar Məmmədyarov, Elşad Nəsirov baş katib Sərxan Hacıyev və PFL-in rəhbəri Elxan Səmədovla görüşərək stadiondan ayrıldılar. Bu zaman AFFA-nın vitse-prezidenti Səmədova baxaraq yumruq göstərərək “hər şey yaxşı olacaq” dedi.

İLKİN SULTANLI