Mütləq Döyüş Çempionatının (UFC) iki çəki dərəcəsi üzrə sabiq çempionu Konor Makqreqor zorlamada ittiham olunur.

"Football-plus.az" xəbər verir ki, irlandiyalı idmançı iyunun 9-da Milli Basketbol Assosiasiyasının (MBA) “Mayami” və “Denver” arasında final seriyasının 4-cü oyununu arenadan izləyib. Orada Neymarla görüşən döyüşçü hələ görüşün fasiləsində səs-küylü insidentin iştirakçısı olub. Belə ki, tribunalara müraciətində ağrıkəsici spreyi reklam edən Makqreqor ardınca meydançanın mərkəzində “Mayami”nin Berni adlı maskotunu nokauta göndərib. Azarkeşlər əvvəlcə Konorun zarafat etdiyini düşünsələr də, zərərçəkmişə tibbi yardım göstərmək lazım gəlib. İrlandiyalı bu səbəbdən fitə basılıb. Ancaq iki gün əvvəl yayılan xəbərlər onun başını daha çox ağrıda bilər.

“TMZ Sports” portalının yaydığı məlumata əsasən, Makqreqor zorlamada ittiham olunur. Vəkil Ariel Mitçellin məktublarında “Denver”in iyunun 9-da “Kaseya Center”də 108:95 hesablı qələbəsindən sonra idmançının tualetdə qadına amansız hücum etdiyi iddia olunur. “Mühafizə xidməti xanımın arenadan çıxışına və rəfiqəsinin köməyə gəlməsinə mane olub. Ardınca əlillər üçün tualetdən çıxan Konor qadına qarşı güc tətbiq edib. Zərərçəkmiş bir müddətlik onun əlindən tualetə qaça bilib. Ancaq Makqreqor daha sonra qadını intim əlaqəyə girməyə məcbur edib. Xanım sonda irlandiyalıya bir neçə dəfə dirsək zərbəsi endirib, oranı tərk edib, unutduğu çantanı isə Konorun mühafizəçiləri aparıb”, - Mitçellin məktubunda qeyd olunub. Zərərçəkmiş ertəsi gün yerli hakimiyyət orqanları ilə əlaqə saxlayıb.

Makqreqor, MBA və “Mayami” artıq qadının polislə görüşdən sonra verdiyi ifadə ilə tanış olublar. Zərərçəkmiş məsələnin adı çəkilən hər üç tərəflə tənzimlənməsini tələb edir. Eyni zamanda, Konorun nümayəndələri iddiaları yalan adlandırıblar. UFC isə başverənlərdən xəbərdar olduğunu bildirib: “Təşkilat bir müddət əvvəl Konor Makqreqorun ünvanına səslənən ittihamlardan xəbərdardı və insidentlə bağlı əlavə məlumat toplamağa davam edir. UFC hansısa əlavə açıqlamalar verməzdən əvvəl məhkəmə prosesinin keçməsini gözləyəcək”. “Mayami” nümayəndələri isə məsələyə şərh vermək istəməyiblər.

Maraqlıdı ki, Makqreqor səslənən ittihamlardan bir gün əvvəl həyat yoldaşı Di Devlinin 4-cü uşağı gözlədiyini xəbər verib. “Böyük övladım Konor Juniorun 6, qızım Kroya Meyridin 4 yaşı var. Kiçik oğlum Rianın 2 yaşı yenicə tamam olub, artıq sırada biri də var”, - deyə idmançı “Kelli və Mark ilə canlı efir” şousunda bildirib.