“Qvardiolanın öz baxış tərzi ilə futbola yeniliklər gətirdiyini hər birimiz bilirik. O bunu hələ “Barselona”da işlədiyi dönəmdən etməyə başlayıb. Haqlı olaraq dünyanın ən yaxşı məşqçilərindən biri sayılır.

Müasir futbol iki yerə - Qvardioladan əvvəl və sonrakı dönəmlərə bölünür. Bizim finala yüksəlməyimizin özü artıq inanılmaz uğurdu. Bu uğura birlikdə hərəkət etməklə nail olmuşuq. “İnter” sübut etdi ki, mümkünsüz heç nə yoxdu. İndi son nöqtəni qoymaq lazımdı.

Final çox çətin keçəcək. Favorit sayılmadığımızı bilirik. Amma futbol favoritin heç də həmişə qalib gəlməməsinə görə bu qədər gözəldi. Hər xırda detal böyük rol oynayacaq. Ona görə də diqqətli olmalıyıq. Lazım olanda müdafiə olunmağı, lazım gələndə hücum etməyi bacarmalıyıq.

Bəlkə də dünyanın ən güclü klubu ilə qarşılaşacağıq. Şübhəsiz, bu, karyeramın ən vacib oyunu olacaq. Bu sözlər futbolçularıma da aiddi. Bizim heyətdə heç kim daha öncə finalda oynamayıb. Yalnız Onana ilə Cekonun yarımfinal təcrübəsi var”.