"Cütləri nəzərə alsaq, finalda favoritlərin, yəni "Neftçi"ylə "Qəbələ"nin yer alacağını gözləyirdik. Amma ilk oyunlardan sonra bütün komandaların şansı var idi. Çünki meydan sahibləri çətinliklə minimalhesablı qələbəyə nail olmuşdu. Qeydə alınan nəticələr “sürüşkən” olmaqla yanaşı, uduzan komandaların da, qələbə qazananların da cavab oyununda çarpışacağından xəbər verirdi.

"Neftçi" üçün hər iki qarşılaşma olduqca ağır keçdi. Tovuz təmsilçisi maksimum müqavimət göstərdi. Bu üzdən "ağ-qaralar" cavab görüşündə həddən artıq güc sərf etdi və sonda ustalıq səviyyəsi hesabına rəqibi üstələməyi bacardı. "Qəbələ" həm premyer-liqada, həm də kubokda yaxşı mübarizə aparır. Bölgə təmsilçisi iki “cəbhə”də kreativ futbol sərgiləməklə avrokuboklara vəsiqə uğrunda döyüşür. "Səbail" kubokda xeyli irəliləsə də, bütünlüklə premyer-liqada qalmağa fokuslayıb. Bunu Şahin Diniyevin hələ Qəbələdəki ilk oyunda eydiyi rotasiyalardan da görmək mümkün idi. Amma bu o anlama gəlmirdi ki, "dənizçilər" kubokdan əlini üzüb.

İstər ilk oyunda, istərsə də cavab görüşündə "Səbail" yaxşı mübarizə apardı. "ASCO Arena"da keçirilən matçda da Şahin Diniyevin yetirmələri mübariz futbol sərgilədi. Başabaş oyun getdi. Sadəcə, ikinci yarıda meydan sahiblərinin 3 futbolçusunun qırmızə vərəqə alması "Qəbələ"nin üstünlüyünü qoruyub saxlaması ilə nəticələndi. Qarşıda bizi maraqlı final matçı gözləyir. Hər iki komandaya uğurlar arzulayıram" .