"Mövsümün əvvəlindən superliqa təmsilçisi "Ankara Böyükşəhər Bələdiyyəsi FOMGET GSK" klubundayam. Komanda uzun illərdi güclülər dəstəsindədi. Yeganə klubdu ki, ötən mövsüm yekunlaşandan sonra heç bir oyunçu heyəti tərk etmədi. Əsas üstünlüyü odu ki, xanımların böyük əksəriyyəti həm Türkiyənin, həm də başqa ölkələrin yığmalarının üzvləridi. Hər biri keyfiyyətli oyunçudu. Superliqada “6+2” limiti tətbiq olunur. Yəni 6 legioner start heyətində oynaya, ikisi isə sonradan meydana çıxa bilər. Heyətimizdə Ukrayna millisinin 5, Monteneqro, Bosniya və Hersoqovina və Azərbaycanın hərəyə 1 futbolçusu çıxış edir. Söhbət Ayşən Əhmədovadan gedir. Qalanları isə Türkiyə yığmasının üzvləridi. Əvvəlki illərdə komanda nə qədər yaxşı çıxış etsə də, pley-offa yüksələ bilmirdi. Mövsümün əvvəlində məşqçilər korpusunu dəyişərək daha peşəkar mütəxəssislər dəvət etdik.

Qarşıya qoyulan əsas məqsəd finalda oynamaq və çempion kimi avrokuboklara qatılmaq idi. Superliqa A və B olmaqla 2 qrupa bölünür. Bir qrupda 10, digərində 9 komanda yer alır. B qrupunda 16 qələbə, 1 heç-heçə və 1 məğlubiyyətlə pley-offa çıxdıq. Burda "Hakkarigücüspor"u iki oyunun nəticəsinə görə 6:2 məğlub etdik. 1/4 finalda "Fatih Vatanspor"la səfərdə qolsuz heç-heçəyə nail olsaq da, doğma meydanda rəqibi darmadağın etdik - 5:0. Yarımfinalda isə ötən ilin çempionu "ALG Spor"la qarşılaşdıq.

İlk oyunda evdə 3:1 hesabıyla rəqibi məğlub etməyi bacardıq. Mayın 20-də cavab matçına çıxacağıq. Həmin oyuna ciddi hazırlaşırıq, maksimum motivasiyalıyıq. Məqsədimiz onları da üstələyib "Qalatasaray" - "Fənərbaxça" cütünün qalibinə rəqib olmaqdı. Hər iki komandanı yaxşı tanıyırıq. Doğma meydanda adı çəkilən nəhəngləri məğlub etmişik. Qrupda yeganə yenilgini səfərdə "Qalatasaray"dan almışıq. Heç-heçə isə "Fənərbaxça" oyunda qeydə alınıb. Odu ki, finala çıxsaq, yenidən tanış komandalardan birini sınağa çəkib üstünlük əldə etməyə çalışacağıq".

"Ayşənin potensialına yaxşı bələdəm. Onu komandaya mən gətirmişəm. İlk 11 oyunda çıxış edib özünü yaxşı tərəfdən göstərdi. Amma sonra millinin toplanışına qatıldı və ordan zədəli qayıtdı. Zədəsi tam sağalmadığından son oyunlarda onu qoruyuruq. İnanıram ki, zədəsini tam sağaldandan sonra yüksək performans sərigiləməklə bizə kömək edəcək".