AFFA-nın baş katibi 12 komandaya lisenziya verilməsinə münasibət bildirdi
Dünən Lisenziya Komissiyasının 12 kluba lisenziya verməsi futbol ictimaiyyəti arasında “2023/23 mövsümündə premyer-liqada 12 komanda olacaq” fikrini formalaşdırdı. Halbuki AFFA-nın baş katibi Sərxan Hacıyev martın 7-də keçirilən assosiasiyanın toplantısından sonra təşkil olunan mətbuat konfransında açıq mətnlə idman prinsiplərinə əməl olunacağını, bir komandanın mütləq şəkildə elitanı tərk edəcəyini vurğulamışdı.
Bəs indi nə oldu? Geridə qalan müddətdə nə dəyişdi? Bu suallara cavab tapmaq üçün Sərxan Hacıyevin fikrini öyrənməyi lazım bildik. Baş katib “Football-plus.az” a açıqlamasında bunları söylədi:
“Bildiyiniz kimi, aşağı dəstə təmsilçilərindən “Araz Naxçıvan”la “Zaqatala”ya lisenziya verilib. Mövsümün əvvəlində də qeyd etdiyim kimi, Əsasnaməyə uyğun birinci dvizionda ilk yeri tutan komanda premyer-liqaya vəsiqə qazanır, elitada sonuncu olan isə diviziona düşür. Lisenziyanı əldə etmək hələ premyer-liqaya vəsiqə qazanmaq anlamına gəlmir. Bu o deməkdi ki, hazırda ancaq aşağı liqada birinci yeri tutan və lisenziya alan komanda premyer-liqaya vəsiqə əldə edib. Divizionun qalibi olan və lisenziya alan komanda hansısa səbəbdən premyer-liqada iştirakdan imtina etsə, o zaman lisenziya qazanan digər komandaların məsələsi nəzərdən keçirilə bilər. Bütün bunlar da AFFA İcraiyyə Komitəsində müzakirə olunacaq məsələlərdi”.
Baş katib aşağı dəstədə planlaşdırılan say artımına da toxundu:
“Birinci divizionda iştirak etmək istəyən bəzi klubların müraciətinə baxılıb. İndiki məqamda detallı şəkildə açıqlama verə bilmirik. Bununla bağlı qərar da İK-nın növbəti toplantısında veriləcək. Diviziona gələcək 4 komanda ilə bağlı prioritetimiz dəyişməyib. Əsasən bölgə təmsilçilərinə üstünlük verəcəyik. Əsas şərtimiz isə infrastrukturla bağlıdı”.
RƏŞAD
Digər xəbərlər
