Lionel Messi Səudiyyə Ərəbistanına gedib. PSJ-nin argentinalı hücumçusunun bu ölkəyə qəfil səfəri ilə bağlı maraqlı şayiələr dolaşır.

Jurnalist Əbdül Rəhman Əl-Rəfdanın “tvitter” səhifəsində yazdığına inansaq, Messinin Ər-Riyada gəlişinin yerli “Əl-Hilal” klubuna mümkün transferi ilə bağlı yayılan xəbərlərlə heç bir əlaqəsi yoxdu. Argentinalı hücumçu Asiya ölkəsinin turizm səfiri olduğu üçün 2-ci dəfə Səudiyyə Ərəbistanına gəlib.

35 yaşlı Messinin PSJ ilə müqaviləsinin müddəti 2023-cü ilin iyununda başa çatacaq. Daha əvvəl beynəlxalq KİV-də “Əl-Hilal”ın argentinalıya illik 400 milyon avro maaş təklif etməyə hazır olduğu barədə məlumatlar yayılmışdı. Ancaq dünya çempionunun “Baselona”ya qayıdacağı gözlənilir.

Bu mövsüm 37 oyunda 20 qol vuran və 19 məhsuldar ötürmə verən Messi yayda sabiq komandasına qayıtmağa hazırlaşır. Fransa mənbələrinin xəbərinə görə, ulduz futbolçu İspaniya klubundan müqavilə təklifi gözləyir və təklif göndərilən kimi qəbul edəcək. Eyni zamanda “Barselona” La Liqa ilə növbəti mövsüm üçün maaş və transfer xərclərini əhatə edən iqtisadi planı təsdiqləməlidi.
“Maliyyə feyr-pleyi”ni pozmamaq üçün bu məbləğ 200 milyon avronu keçməməlidi. “Barselona” artıq bir neçə gün əvvəl maliyyə planını La Liqaya təqdim edib. Bu plan təsdiqlənməsə, başqa bir plan təqdim ediləcək. Təsdiqləmə olan kimi klub Messiyə rəsmi təklif göndərəcək.

Eyni zamanda, maaşın Messi üçün fərq etməyəcəyi vurğulanıb. Çünki o, yenidən “Barselona”da oynamaq istəyir.

Yeri gəlmişkən, Lionel sosial şəbəkə hesablarında Səudiyyə Ərəbistanı ilə bağlı paylaşım edib. Bu ölkədən şəkil paylaşan argentinalı futbolçu belə yazıb: