Görəsən, “sarı-göylər”in cari mövsümdə yerli publika qarşısında çıxış etmək ehtimalı var? Düzdü, bu barədə klubun idman direktoru Mehman Allahverdiyev “Football-plus.az”a açıqlama verib. Ancaq o da ehtimal üzərindən danışıb. Klub rəsmi olaraq 2022/23 “futbol ili”ndə bir daha Gəncədə oynamayacaqlarını açıqlamayıb.
Məsələni dəqiqləşdirmək üçün “Kəpəz”in mətbuat katibi Azad Mustafayevlə əlaqə saxladıq. Klub rəsmisinin məsələyə münasibəti belə oldu:
“Sabah”la oyundan sonra cəmi bir ev oyunmuz qalır. “Neftçi”ni qonaq etməliyik. Paytaxt təmsilçisi ilə qarşılaşamya isə təxminən 2 həftə vaxtımız var. Ot örtüyünün vəziyyəti də tədricən düzəlir. Yeni səpilən toxumdan sonra qazon cücərib. Ancaq hələ o səviyyədə deyil ki, indidən konkret nəsə deyək. Oyun ərəfəsində klub rəhbərliyi örtüyün durumuna uyğun PFL ilə birgə müzakirədən sonra ümumi qərar verəcək”.
Xatırladaq ki, “Kəpəz” – “Neftçi” matçı mayın 21-nə təyin olunub.
RƏŞAD
