MHL klubları tarixdə ilk dəfə Avstraliyada oyun keçirəcəklər.

Liqanın saytının yaydığı xəbərə görə, “Los-Anceles” və “Arizona” sentyabrda Melburnda iki sərgi görüşünə çıxacaq. Sentyabrın 23-24-nə nəzərdə tutulan oyunların “Böyük dəbilqə” seriyalı “Australian Open” tennis turnirinin keçirildiyi Rod Leyver arenasında təşkili planlaşdırılır.

MHL Şimali Amerikada açıq havada keçirilən oyunların təcrübəsindən çıxış edərək arenanı hokkey oyunları üçün hazırlayır. Hərəkət edən tavan örtülmüş vəziyyətdə olacaq. Bununla da MHL komandaları tarixdə ilk dəfə Cənub yarımkürəsində oyun keçirəcək. MHL-in vitse-prezidenti Devid Properin bununla bağlı dedikləri: “Yetərincə tədqiqat aparmadan və bu ideyanın əhəmiyyətinə əmin olmadan belə tarixçələrə baş vurmuruq. Hesab edirik ki, Avstraliya bizim üçün yaxşı bazardı”.