“Əsas məqsədimiz Azərbaycanda uşaq futbolunun inkişafına töhfə verməkdi. Bu məqsədlə 12 yaşlılardan ibarət komanda ilə turnirə qatıldıq. Onlar burda böyük təcrübə qazandı. Oyunlardakı uğurlu çıxışları bundan sonrakı hədəflərə çatmaq yolunda bizə çox kömək edəcək. Ölkəmizi ən yaxşı səviyyədə təmsil etmək üçün çıxdığımız yolda bunu bacardığımız üçün çox sevincliyəm. Komandamla söhbətlərimdə də vurğulamışdım ki, biz “Neftçi”ni yox, Azərbaycanı təmsil edirik. Buna uyğun da oynamalıyıq. İlk oyuna çıxmamış uşaqlarla söhbətdə onlara motivasiya verdim. Bir çox ölkənin təmsilçiləri ilə qarşılaşacaqları üçün çox həyəcanlıydılar. İzah etdim ki, burda geri çəkilməyə səbəb olacaq heç nə yoxdu. Özümüzü yaxşı tərəfdən göstərməliyik. Birinci gün üçün U-12-nin qarşısına qoyduğum tapşırıq 4 xal idi ki, bunu bacardılar. “Yuventus” qrupun ən güclülərindən idi. Hesab açılmasa da, bu matçda komanda mühitə öyrəşdi, həyəcanına qalib gəlməyi bacardı. Güclü rəqibdən xal almağımız qalan oyunlarda daha yaxşı performans göstərmək üçün təməl rolunu oynadı. Hətta burda oynadığından qat-qat üstün çıxış edən futbolçularımız oldu. Biz qələbəyə köklənmişdik. Hər uşaq özünü sübut etmək üçün var gücü ilə çalışırdı. Maraqlı bir məqamı da qeyd edim ki, ən çox izlənilən matçlar “Neftçi”nin oyunları idi. Hətta digər komandaların baş məşqçiləri və oyunçuları, həmyerlilərimiz gəlib bizi izləyirdilər. İkinci oyun gününə ən yaxın rəqibimiz “Beşiktaş”la qarşılaşma ilə başladıq. Bizim 4, Türkiyə təmsilçisinin isə 6 xalı var idi. Bu əhəmiyyətli oyunda qələbə qazanmaq çox vacib idi. Turun “açar” görüşündə qalib gələndən sonra digər matçlar daha asan alındı. Ardıcıl qələbələrimiz oldu”.

“Ümumilikdə qeyd etməliyəm ki, futbolçularımız fiziki cəhətdən rəqiblərdən çox geri qalırdı. Lakin praktiki və psixoloji üstünlük bizim tərəfdə idi. Vacib məqamlardan biri də odu ki, ölkəmizdə belə turnirlər, çempionatlar müntəzəm keçirilmir. Futbolçular eyni gündə bir neçə oyunda iştirak etməyin ağırlığına yüklənəcək səviyyədə deyil. İstəyirəm ki, gələcəkdə bizi beynəlxalq arenada təmsil edəcək komandalar daha potensiallı, güclü olsun. Bunun üçün də daha çox işləməliyik. Ümid edirəm ki, AFFA bu yöndə lazımi addımlar atacaq. Mənim də təkliflərim var ki, bu barədə çıxış edərək ölkə futboluna daha çox fayda verməyə çalışacam”.