Misli premyer-liqasında 29-cu tura start verilib.

"Football-plus.az" xəbər verir ki, "Qəbələ" "Zirə"ni qəbul edib - 2:1. Matçdan sonra qonaqların çalışdırıcısı Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:

- Komandanın uğursuz seriyasını dayandırmaq üçün nə çatmır?
- Əslində yaxşı başlamışdıq, rəqib ikinci qou vurana qədər oyun da yaxşı gedirdi. Buraxdığımız qollara artıq şərh tapa bilmirəm. İnanmıram hansısa komanda bu qədər bu tip qollar buraxsın. Buraxdığımız qolların şərhi futbolun kənarındadı. Təhlükə olmayan yerdə qapıda qol görürük. Buraxdığımız topların 80 faizi bugünkü birinci qola bənzəyir. Bu gün qələbə qazanmaq üçün başqa nə etmək olardı, bilmirəm. Boş qapıdan müdafiəçi topu çıxardı, təkbətək epizodlarımız var idi. Əla oyun gedirdi və o cür qol buraxdıq. Bununla necə mübarizə aparacağımızı bilmirəm.

- Mövsümün əvvəlindən qapıçılarınız kobud səhvlər edir. Qışda yeni qolkiper transfer etmək olmazdı?
- Əslində axtarışlarımız var idi. Rəqabəti artırmaq üçün qapıçı transfer etmək istəyirdik. Amma istədiyimiz qapıçı olmadı. Olsaydı, hər hansı həmlə edərdik. Yerli oyunçu limiti də var. Çünki, sol cinah müdafiəçisi mövqeyində legioner oynadacaqdıq. Əvvəl Təmkin Xəlilzadə ilə Slavik Alxasov oynayırdı. Belə olan halda qapıda legioner oynada bilərdik. Bu dəyişiklikdən sonra düşündüm ki, qapıda legioner olsa, meydanda 4 əcnəbi oynada bilməyəcəyik.

- Komandada bu qədər səhvlərin olmasının futbolçuların ustalıq səviyyəsi ilə bağlılığı var?
- Bilmirəm. Heyətimdən narazı deyiləm. Nə desəm, boş olacaq. Bu günə qədər söz tapırdıq, fikirlər ifadə edirdik. Artıq bilmirəm. Deyiləcək söz yoxdu. Vurmadığımız epizodları göz önünə gətirin. Heç bir təhlükə yox idi, top Anarın əlində idi və əlindən düşüb qapı xəttini keçir. Çox qəribədi. Səbr edirəm, işimə davam edirəm. Nə özümə, n vdə cəmiyyətə dəyəcək şərh tapmıram.

- Ümidsizsiz?
- Yox. Ümidsizlik mənə xas olan bir şey deyil. Sona qədər mübarizəmizi aparacağıq. Kubokun da psixoloji cəhətdən üzərimizdə basqısı oldu. Düşünürdük ki, "Sabah" və "Qarabağ" yarımfinala çıxsa, avrokuboklar üçün 4-cü yer yüz faiz kifayət edir. Amma həm özümüz, həm də digər komandalar kubokda kənarda qaldı. Kubokun nəticəsinin necə olacağı bilinmir. 4-cü yeri tutan komandanın avrokuboklara gedib-getməyəcəyi bilinmir. Bu, hamını bir az sarsıtdı. Amma bunlar futbolun içində olan şeylərdi. Düşünürəm ki, çempionatda 4-cü yeri tuta biləcəyik.

- Baş verənlərdən bezməmisiz?
- Yox. Sadəcə olaraq söz tapa bilmirəm. Yalandan nəsə danışmaq istəmirəm. Söhbət sırf buraxdığımız kobud səhvlərdən və vura bilmədiyimiz epizodlardan gedir. "Neftçi" və "Qəbələ"ni məğlub edə bilərdik. Dəyərləndirilməyən epizodlar istər-istəməz problem yaradır. Hücumameyilli heyət buraxmağa məcbur oluruq. Vaxtında fərqlənsəydik və uşaq səhvi etməsəydik, rəqib basqı altında olacaqdı. Bizim oyunlarda qırılma nöqtələri çoxdu. Təəsüf ki, bunların heç biri bizim xeyrimizə olmur. Səbr edib yolumuza davam edəcəyik.

- Avrokuboklara gedə bilməsəz, yayda heyətdə ciddi dəyişikliklər ola bilər?
- Uğursuzluq olandan sonra tək heyət yox, insan tutduğu vəzifə haqda da düşünməlidi.

- İstefa verəcəksiz?
- Söhbət istefadan getmir. Ümumiyyətlə deyirəm. Bu gün o haqda danışmaq istəmirəm. Mənim özüm üçün də nəticə vermək çox önəmlidi. Uğursuzluq olsa, rəhbərliklə danışacağıq. Təbii ki, problemlər məndə olsa, mən heç bir yerdə ikiəlli yapışmamışam. Bu, həmişə belə olub, bundan sonra da belə olacaq. Hazırda bütün fikrimiz 4-cü yer uğrunda mübarizədədi.

- "Qəbələ" şəxsi oyunlarda üstünlüyü ələ keçirdi. Bu haqda nə deyə bilərsiz?
- Bəli. Şəxsi oyunlarda üstünlüyü ələ almaq üçün qələbə qazanmaq istəyirdik. Mütləq şəkildə "Qəbələ"ni xal fərqində üstələməliyik.